義教咗幾年大提琴，昨天都係決定放棄了，原因唔係因為學生本身學得好唔好，我唔會因為學生學得唔好而唔教佢， 我明白接受義教既家庭有佢地既難處，所以我都會盡量配合，唔會有咩既要求，唯獨嘅底線就係基本嘅尊重以及唔會接受家長搵另一位老師來同時教授大提琴，原因就好似同時間用繁體與簡體字教授中文一樣，會令學生好難打好根基。

亦因為咁我一開始教學生之前都會了解佢地既情況及先小人後君子講明如果貴子弟有跟其他老師學琴既話我唔會教。不過這位家長一開始就已經避重就輕地帶過左學生其實係學校有跟老師學琴一事，直至我發現，跟住學生家長既解釋係學校既大提琴老師不務正業上堂嘅時候只係喺度玩電話，而佢因為升中問題唔想得失學校所以才會繼續上堂。亦都因為咁樣所以我由得佢。

經過一年多既時間，我用左好多心機去教呢個學生由佢用小提琴既握弓方法去拉大提琴，幫佢改正握弓，幫佢提升自信心，教佢用唱譜既方法去練琴。好明顯見到佢開始喜歡大提琴同時間亦得到學校既認同而成為學校既大提琴首席。不過呢個亦都係佢上我課堂懶散既開始。上年我已經發覺有問題，亦多次提醒佢唔好俾呢啲無謂嘅優越感去沖昏咗頭腦，拉琴重要嘅享受音樂嘅過程，而唔係為咗俾人讚或者追捧，我諗佢真係聽唔入耳啦，我俾佢既功課總係好難至會完成，好似每堂都係來練琴一樣，每次都有佢既理由，我都覺得唔緊要啦，心諗佢都有佢既難處。但上年中既時候，我開始覺得好奇怪，點解這位學生拉弓又會變番好似拉小提琴咁，咁我又再幫佢執過握弓嘅姿勢啦，經過大半年嘅努力糾正佢握弓嘅姿勢之後，佢按弦既手型完全變型，好似喺大提琴上面玩小提琴咁。

直到上年尾今年初，更加係樂譜上面寫音同數字，仲要開始係指板上面貼紙來搵音，呢個時候我再問佢家長才承認學校大提琴老師，換咗另一位新老師。喺呢一刻我先至恍然大悟，點解每次上堂都好似打仗咁，因為新老師係教學生用記數字既方法去拉琴，其實用咩方法無對錯只係唔同方法同先後之分而已。我無因為家長隱瞞而怪責佢，不過我再一次同家長解釋初學唔可能同時間真係位老師學琴㗎，然而家長話今年四月表演之後可以唔使再理會學校，因為學生今年升中，所以雖然有被蒙在鼓裏嘅感覺，但係我都忍落去，跟住學生演奏會之後我再幫佢上左兩星期課，我發覺依然都係唔多妥，所以就向義教組織求助，經義教既老師介入之後方知道原來四月之後家長稱可以唔理會學校既大提琴老師及樂團係一個大話。所以經商量之後我決定暫時唔教佢直接佢七月先至再開課。

就係呢段冷靜嘅期間，學生嘅家長完全沒有就學生停課嘅問題而同我聯絡，反而向兩年前因為我而俾演奏飛佢嘅老師問好，成件事真係好奇怪，因為完全只係一面之緣，我老師只係因為佢係我學生，所以留低聯絡電話俾佢去攞演奏會飛，呢位家長從此開始就過時過節都會發訊息俾我老師問候，老師雖然唔介意，但實際上我老師是完完全全唔識呢位家長呢，昨天老師同我提起，呢位家長母親節亦發祝福嘅訊息我老師問好，我就好理性咁樣衡量成件事，學生家長沒有因應學生既問題跟我聯絡商討，反而有心力去跟因為我既緣故而只有一面之緣既老師問好，加上教左呢位學生兩年多之後，呢位學生上堂懶散既態度，同埋係街見到我及係演奏會見到我都好似陌路人一樣，所以就決定唔教呢位學生。

同義教組織交代之後，學生家長搵我，佢以為因為發左信息俾我老師而我唔教，當然對於只係一面之緣既唔係商業往來更加沒有與你正式交往過既人來講，不斷既祝福訊息其實係並不是一種尊重，因為對方與自己跟本唔算係相識，更甚者收信人因為禮貌嘅關係要去回覆個訊息呢。不過這不是我唔教既原因，最後我都要解釋番俾個家長知，我並不是因為佢發信息給我老師而唔教，而係我真係唔知點樣教，好似教個小朋友寫字，明明教好咗佢寫繁體中文字，跟住家長俾錢請人教佢寫簡體字，但係考試又要用繁體字喎，我做義工幫個小朋友糾正用番繁體中文字之後，家長又俾錢人哋去教個小朋友去寫返簡體字，之後仲要問你原來下星期考試啦喎，咁樣教一個學生真係好累！至於家長與學生既選擇點解要俾錢請人教寫簡體中文佢哋自己嘅原因罷，但這太影響我自己既情緒，因為每星期我去義教係完全冇錢冇利益關係，而且因為要帶大提琴嘅關係我仲要自己揸車去同埋支付停車場費用，有陣時甚至乎要去改自己嘅工作時間或者搵人替工呢。

最後我都希望這位學生學懂珍惜及真正搵到自己想過既人生！