我自細開始有一個變態嘅癖好，如果一位「熟人」自誇自己一啲不大可能嘅事情，就算我明知係戲言都好啦，我都會好想可以做實驗咁去試一試佢，仲記得我好細個嘅時候，我表姐同我講話自己好大膽咩都唔驚，跟住我就特登開咗套『黑太陽731』俾佢睇，跟住自己走開咗，呢件事佢到而家都仲記得我諗佢好嬲我，當然佢而家講話唔驚，但其實當其時佢好驚😅，而家諗返我都覺得自己變態🤣

跟住好多年前我曾經有一位朋友話：「希望神會比佢遇到一位佢好鍾意嘅人，呢個人佢好難先至追得到，但佢會去愛佢一生，會一直去追佢」，當我聽到呢啲咁樣嘅說話我就會好想去測試佢😆，當然佢最終梗係冇同佢嗰位所謂最鍾意好難追嘅人一齊啦！另外一個就係近年發生，有位我俾咗好多心機同時間落去教嘅cello學生，佢嘅監護人同我講遇到我真係好好彩，好大福氣，不過喺個學生學習嘅過程當中冇好好咁樣去學習而且監護人亦都做咗一啲一開始我已經同佢講咗唔應該做嘅嘢，之後我決定唔再教佢，但同時間其實我係比緊一個測試佢哋，我想睇吓我係咪真係佢口中所講佢地咁珍惜既老師，好可惜結果真係好失望！

可能我真係太認真，其實我真係好想去相信呢啲人所講既野，就算直覺講俾自己知對方只係戲言，我都希望自己直覺係錯，尤其係對於一啲熟人，自己想珍惜嘅人。