見證我返嚟香港呢十幾年嘅Sparkie過咗身之後，令我再一次體會到生命係無得代替，要珍惜彼此緣份既話一定要喺生命之火仲未熄滅之前，因為生命真係無常，之前嗰一晚可能仲好活潑好開心嘅小狗第二朝一早可能就已經會離你而去， 好耐之前我就已經明白生命完咗既話就自己有幾咁想珍惜呢份緣份都唔好可能再有呢個機會，所以我嘗試去珍惜同每個生命之間嘅關係。

亦因為明白同害怕自己會後悔，所以我至返來香港同父母一齊生活，對於就算傷害過自己既朋友，我都依然會關心，可惜既係對方未必會領情，我甚至因為咁樣而遭到出賣。不過唔緊要，因為我就係有啲怪既想法，我覺得世上一切包括自己既身體都唔係屬於我，我只係借緊呢個世界嘅資源去經歷呢一切，去享受呢個遊戲。但係呢種想法喺呢個世界上面就好似一種異類一樣嘅想法，其實冇分對錯嘅，只係有啲人既人生為了物質，有啲為左食，有啲為左性，有啲為咗權力又或者高人一等嘅感覺，只不過呢啲唔係我想要既野，就好似睇戲咁，可以選擇既話我會睇一啲有感情有劇情既戲，而唔係睇地產廣告雜誌，飲食節目或者Porn。

近日我連埋藏係心裏面好耐好耐嘅說話都講咗出嚟，所以結果係點已經再唔係我嘅責任，由嗰一日開始我整個人輕鬆晒，已經冇咩好遺憾可以真真正正咁樣去面對自己生命餘下嘅時間，每朝同媽媽及兩隻狗一齊出去晨運，努力咁做自己嘅工作，去義教小朋友拉大提琴，雖然唔係好轟轟烈烈好精彩好華麗好壯觀好豐富，某程度上係好平淡，但簡簡單單其實幾開心，因為我好明白每一個生命都不是永恆地係自己嘅身邊，茫茫人海裏面要遇到一個人嘅機會率其實好低，就算有輪迴轉生俾你再撞到呢個人佢都已經唔再係同一個人罷。相同嘅道理，養一隻狗其實都係一樣，同每隻狗嘅相處其實都唔一樣亦都唔可以代替，更何況係人呢！如果你有緣睇到我發噏風，我都希望你幸福快樂，並可以好好咁面對你自己嘅人生而作出適合你自己嘅選擇而唔好等冇得返轉頭嘅時候先至去後悔。