接左Hugo番來個幾月啦，回想過去三個月既經歷及接觸到既一切，提醒我生命呢個旅程之中除咗經歷之外所遇見既每一個生命亦都係非常珍貴既機會，縱使有啲生命令你覺得纏繞或者唔好受，甚至乎心懷不軌，但其實都係一個緣份，今日見到面唔代表聽日會再見到，當然有啲人會對你有唔好既影響，有啲特別有好感，有啲人莫名其妙地討厭你，我身邊都有啲見到我就憎既人，我做咩佢都唔順佢意（真係唔好意思，我係一個高敏兒，所以我對別人既情緒變化真係好敏感），舊時我總係不理會自己既感知而若無其事地去同呢啲人相處，但一次又一次既現實講我知，不必再為呢啲唔珍惜彼此緣份嘅人費心😊，因為嘗試去改變一個人點樣去睇自己其實係唔啱，亦都冇必要，只可以做好自己，珍惜呢個緣份就可以了。

對我來講所謂既「緣」，係有時間性既機會率，人生裏面時間係有限，我地冇可能認識世上既所有生命，當係有限既人生及眾多嘅生命裡面要遇到另到一個生命既機會率其實真係好低，而不論係對方抑或係自己既生命都係有一定既時限，對於兩個生命互相既時限完結之前而遇到對方既就係「緣」罷，而「份」呢就係當自己面對每一個「緣」而作出既選擇或處理方法，雖然一直以來我都盡力去珍惜我所遇到既生命，而係過程之中亦難免會有一啲做得唔好既選擇，可幸既係每次面對一啲我有可能會後悔既「緣」尚未完結之前，我都可以做番一個適當嘅選擇或處理，從而好好咁完成左呢個「份」，因為我明白有「緣」係生命裡面遇見另一個生命真係唔容易，最起碼我係對方或自己既生命完結之前做晒我可以做既事就可以，過去六年遇見嘅人同事，令我諗通左好多，舊時見到別人因為屋企關係讀唔成書，所以自己一心諗住幫助對方而介入對方既人生，換來既就算我幫對方入到大學，佢最終佢都係畢唔到業，佢係讀唔到就係讀唔到，最終只係我既多事而介入左佢既人生，因為咁我更明白到每個人都有佢要行要去經歷去感受佢自己既人生，其實不論一個人既人生只係為金錢或是權力甚至乎係物欲，都唔係對錯既問題，每個生命都有佢自己選擇既權利，我可以做既只係選擇係自己生命完結之前點樣去面對每一個「緣」而已。Sparkie既離開更加強化左我呢一種想法，所謂既「緣」「份」只會去到任何一方生命完結之前，當是旦一方既生命完結之後「緣」就會真正盡，所以係真正「緣」盡之前對於我珍惜既生命都盡可能做晒我可以做既事，才是好好咁珍惜每一個「緣」「份」😊！

所以我好珍惜Sparkie俾我既呢十幾年既經歷及教識我既事，同時間亦珍惜佢把我同我既家人拉近既重要性，更加多謝因為佢所以Angie同Hugo至會來到我地既呢個家庭，俾我好好咁去經歷呢一個人生既旅程，感受呢個唔係單純物質世界而係有情同愛既世界🥰！對於果啲為左其他目的而唔珍惜同我之間緣份既生命，我會嘗試去維繫去聯絡去忍耐，之後對方都係唔珍惜既我會放低，就好似媽媽所講打波既道理一樣，你來我往，如果下下都殺球嘅話，咁就無得玩落去喔。所以我明白雖然生命未完緣份可以依然，但對於我嘗試珍惜嘅果啲人來講，呢幾年我已經做左我認為應該做嘅嘢，所以呢個選擇權已經唔係我身上，而係當事人點樣去面對自己，我冇理由要求別人珍惜同我之間既緣份罷，哈哈！

早幾年我仲有少少迷惘，因為我好明白我遲早都會離開呢個世界，我需要世界嘅物質去生存，但世間上所有嘢我都帶唔走亦唔係擁有，包括自己嘅身體，所以我唔會因為有得食咩而好開心、唔會有得去旅行而好開心、唔會因為買咗啲咩嘢而好開心，但我會感恩已經擁有既一切，因為我本身就係咩都冇。反觀見到身邊一啲人為咗物質、權力、金錢或者慾望而成為好虛偽、好恐怖、好黑心、埋沒良心既人，遇到自己珍惜嘅人變成咁樣，果種感覺就好似腦袋變成扭乾毛巾一樣！最慘嗰樣嘢係，我係一個好容易將所有嘢重組起嚟嘅人，當我見到一個人嘅時候，我會自然地將佢所有做過嘅嘢一次過call晒出嚟作出分析，從好細微嘅一句說話一個眼神，就好似詛咒一樣有聲有畫地喺我腦海出現，而家諗返起嚟過去嘅時間我真係唔係太識得點樣處理呢啲資訊 ，有時候要人云亦云將自己融入呢啲會面裏面，其實好辛苦，不過而家學識咗唔會再介入其他人嘅人生旅程，對人生不同睇法既人，點個頭一個尊重及禮貌地打個招呼就可以，如果對方係珍惜自己嘅話，就算好耐冇見，只要一封信都可以連繫起嚟，單方面嘅珍惜其實冇乜意思，每個人就係唔一樣罷😏。而與呢啲人既緣份上面，起碼自己已經做左可以做既事，亦冇咩可以好遺憾，因為我只能夠控制自己唔去斬斷緣份，但不能要求別人怎樣回應每一段「緣」「份」罷！