「冇所謂」同埋「是但啦」呢兩句說話，我諗每日都好多人會聽到或者都會講，就好似我媽咪問我今晚想食咩，我通常都會答佢：「冇所謂啦，你方便就可以啦。」而我講呢句說話嘅時候我內心真係覺得係冇所謂㗎，因為試過自己生活就會知道有人為自己煮一餐飯唔係理所當然嘅事 。

不過有啲人就係口講「冇所謂」但係心底又有另一種想法，就好似同朋友出街食飯咁，有一啲朋友總係話冇所謂食咩都得，不過去到間餐廳就會嫌棄呢樣嫌棄果樣，其實係咪自己折磨自己呢🤣⁉️

當然食飯呢啲就小事啦， 最慘係有啲人將「冇所謂」同「是但啦」變成口頭禪，係不經意嘅情況之下，對於一啲自己未必唔介意嘅事上面向他人表示「冇所謂」就真係搵自己笨，話說有日我同幾位朋友約去Starbucks飲咖啡☕️，其中一位朋友成程自己係度玩電話，朋友之間表示對佢有啲不滿，同佢講出得嚟飲嘢冇理由自己喺度玩電話㗎嘛，但呢位朋友話佢「冇所謂」㗎，佢同佢自己另外啲朋友出嚟食飯都係各自玩電話㗎啦，可能佢真係冇所謂啦，不過我就真係覺得好無聊，好似無啦啦有個人搭枱一樣，而果次之後我同另外一啲朋友都盡可能避免約佢出嚟食飯飲嘢，畢竟大家出嚟都係為咗相聚一下傾吓計而唔係為咗搭枱！

而有啲更為嚴重嘅呢就係，情侶之間鬧分手，如果其中一邊發神經講話冇所謂，咁就可能冇咗一段姻緣㗎啦，老實講如果真係冇所謂嘅話，就應該早早和平分開啦！係嗎？自欺欺人好玩咩？🤪