上星期買咗呢隻好冷門既3DS遊戲整個信和中心只係得一間有得賣,可能係冷門既關係所以新game來講價錢都唔貴,我本身好少係手提機上面玩飛行模擬遊戲,因為做嘢問題多咗玩手提機嘅機會再加上可以用任天堂角色嘅戰機所以買來一玩.

近年我係手提機上面玩過嘅飛行模擬遊戲同樣都係Ace Combat不過就係iOS版本.如果論遊戲畫面細緻度肯定iOS贏晒!不過任天堂嘅遊戲性確實比iOS版本來得好玩.作為手提機玩者一定唔可以要求同電腦上嘅飛行模擬器相比,我反而比較着重遊戲裏面可唔可以給予我戰機與戰機之間嘅追逐感覺.呢隻Ace Combat 3D Cross Rumble +既控制系統確實做到.再加上可以用上任天堂角色嘅戰機又真係幾新鮮.

遊戲其中一個亮點係玩家可以利用任天堂自家出嘅Amiibo來得到一啲特別既戰機,可惜小弟我只係得比卡超一隻Amiibo,當我滿懷希望嘗試用比卡超Amiibo去睇下有冇特別戰機可以得到既時候,系統話俾我知比卡超Amiibo係冇特別戰機,所以如果有需要可以睇睇宣傳影片,裏面有介紹什麼Amiibo可以得到甚麼戰機喔!

另外初回版會有一套五款Ace Combat 3D Cross Rumble + 既Theme Pack下載用來令閣下嘅New 3DS帶有Ace Combat既色彩.