今早起床既時候依稀記得少少夢境裏面發生嘅討論，喺夢境裏面同其他嘅存在討論人生嘅意義，吹水吹得好暢快，正當講到人生與生俱來就係咩都冇，所謂既金銀財寶，生活享受，其實真的只係過眼雲煙嘅嘢，死嘅時候亦都冇咩可以帶走咁其實人生係為咗咩呢？氣氛突然變得好嚴肅，就係呢個時候其中一個夢中既存在同我講人生就係為咗「相遇」，跟住我就醒咗同時間就想起幾星期前與一位媽媽嘅談話內容。

仲記得早幾星期有位媽媽同我講佢前世欠咗佢既自己嘅小朋友，所以今世會盡量都會對佢嘅小朋友好好，佢係好到近無限縱容嘅程度😅，跟住我同佢講其實所有人都係有今生冇來世，不論你係任何宗教嘅信仰都好，當你離開呢個世界嘅時候上天堂又好落地獄又好抑或者所謂嘅輪迴都好，離開之後就唔再可以干涉現在既你呢一個人生既事。咁有冇前世其實又有咩關係呢?反而係點樣好好珍惜今生既緣份更為重要罷，更唔應該諗因為前世欠咗小朋友而要對佢無限容忍。點解我咁樣同佢媽媽講呢，其實我係想俾個小朋友知道佢媽媽對佢有幾好，等小朋友唔好辜負咗媽媽嘅單方面付出同時希望小朋友都好好珍惜同佢媽媽今生嘅相遇。 

諗返起自己所發嘅呢個夢所指既「相遇」，正正就係好似講緊呢樣嘢，世上所有嘅物質只係輔助嘅工具令到我哋可以好好咁樣去經歷與不同生命體嘅「相遇」而已。可惜嘅唔係每個人都懂得好好咁用寶貴既時間去世味同珍惜每一個相遇嘅緣份，而只係為咗物質而奔波一生並帶着無法彌補嘅遺憾而離開。🥺