近幾個月都有啲好奇怪嘅狀況出現，差不多每朝早臨近起床半夢半醒嘅時候，我總係有種好似將要離開呢個世界嘅感覺一樣，彷彿好似提醒自己有嘢做就好做啦，不要留下遺憾既感覺，唔知點解會有啲咁奇怪嘅思想或感覺出現。但當完全醒晒既時侯呢啲感覺就會消失，曾經我有諗過可能係一啲夢境所帶出來既漣漪，直至五月尾至七月初，一些人既出現及同上年相同時期既時間點對比之下，令我反省係喺過一年裡面自己並沒有充實地去面對因Sparkie既離開而導致自己對生命既悲愴及無力感所引至。

表面上過去一年其實真係冇咩唔開心，應當處理既事亦都處理妥當，不過呢兩個月裏面回想起上年同樣時期屋企既氛圍以及自己既情緒，再諗一諗原來我已經一年冇再參加樂團，拉琴好似好懶散，工作交到貨就算數，對於生命既熱誠減退不少，先唔好講任何冇必要嘅奢侈品或者玩具，甚至乎衣食住行的價值觀都好似改變晒，就連我本身真係好想擁有一部Guarneri model 既Cello，曾經有諗過買當代琴師Paolo Vettori所製造既Guarneri Cello，但自從Sparkie走左之後Hugo來到我地屋企之後，意欲大減，因為我感受到生命嘅旅程裏面最重要嘅唔係物質，而係過程。對於有限嘅生命嗰種悲傷同埋無力感避免唔到，而且不知不覺間自己會俾呢種悲傷嘅感覺慢慢吞噬，好彩嘅係Hugo嚟到我哋屋企，俾多左好多野我做，仲有就好似被眷顧一樣不斷有聲音去提醒自己唔好俾情緒吞噬要好好地去經歷同享受生命咁。

所以經歷呢一年後我更加明白人生並非不應該去購買奢侈品或者食米芝蓮又或者去唔同地方旅行，但同時我亦都唔係為左追求呢啲嘢而生存，對我來講所有既身外物，一頓豐富嘅美食，一次旅行，其實都係對唔同嘅人嘅一啲回憶，呢啲回憶就正正就係人生既過程。所以我對於自己買任何奢侈品或者玩具甚至乎去食咩美食又或者自己好超想擁有嘅大提琴我都冇咩興趣再去買，因為自己去買既話，嗰個感覺就係好似只係買一支螺絲批返嚟一樣，冇咩同其他人關連既回憶。

經過呢幾個月嚟嘅怪狀況，加上自己嘅回憶反省，我覺得我更加需要抓緊每一日嘅時間，好好咁樣去經歷，學識原諒所有嘅人包括自己既不是同無能，活出一個自己想要嘅自己並完成呢一個旅程，因為生命嘅長短真係唔係我哋可以控制，彷彿呢啲奇怪嘅狀況，可能真係一個死亡既預視都出唔奇。👍🏼