近幾個月成日聽到人講2025係審判之年，本來都不以為意，但係農曆新年期間見過好多久違既親戚朋友之後，突然間覺得過去幾年對好多人嚟講轉變改變好大，尤其係喺健康問題上面，更甚者斷斷續續都有親戚朋友離世，就算仲在生都好啦，身體狀況都唔見得好得去邊，父母嘅朋友有啲都離開咗其他大部份都係有身體嘅毛病，甚至乎行動不便不能自理，眼見媽媽仲會出去跳舞每日走來走去自己整麵包爸爸尋日仲去參加公開既運動比賽，而自己已經接近兩年都冇食過一粒藥，其實真係好感恩，好感恩自己嘅經歷，而改變自己以及家人既人生，因為明白就算有幾多財富都好少少痛症已經令到你難以有好嘅心情或生活。

改變咗生活飲食習慣之後其實對於好多物質上嘅倚賴真係少咗好多，我唔會再好似以前咁追求一啲好好味嘅料理，我只係着重於食品嘅安全同埋自己需要嘅維生元素，有適當運動足夠嘅睡眠，除左生理上既改變，心態心理亦因為生理而有所改變亦成長不少，享受同家人相處簡單嘅生活，身心愉快既每一日，更加唔會追求去無聊嘅旅行，甚至連買嘢我都只會買自己需要用嘅嘢為主，對於嗰啲Collectibles嘅嘢又或者衫褲鞋襪，我覺得好似真係唔再需要買太多，一星期只有七日，着得幾多啊，又或者對於用唔着嘅嘢嚟講儲嚟做乜嘢呢？

心態嘅改變亦都改變咗我對於緣份嘅諗法，明白到緣份係冇得選擇㗎，喺人生既旅途上面遇到某些人你只可以選擇點樣去對待呢一個人對待呢一份緣份，而對於自己珍惜嘅緣份，係大家都仲喺呢個世界上面嘅時候，我呢幾年都會嘗試過拉返大家個緣份返嚟，因為當生命完結嘅時候就唔會再有機會㗎啦，不過咁樣唔代表對方都會有同樣想返轉頭嘅想法又或者珍惜同我之間嘅緣份，畢竟呢個只係我單方面嘅想法啫，聯絡過對方之後結果係點其實唔到我控制，我淨係知道我應該盡力去維繫自己所珍惜嘅緣份而已。

正正呢一切嘅改變使我重新審視由細到大所接收到嘅資訊，就好似食早餐好重要，食麥皮好健康，靠性生活來減低前列腺癌發生嘅風險同堆荷爾蒙嘅平衡，呢啲基於有立場嘅research或者學說並唔係唔啱，不過有好多論文都係為咗一啲目的而寫出嚟嘅，未必會係故事嘅全部同時亦未必夠全面，但就會成為好多人用嚟斷章取義嘅材料，令到好多人似都要過一模樣既方式去生活。

其實人生存就係與一場與不同生命交織經歷既電影，有啲人鍾意睇動作片，有啲人鍾意睇恐怖戲有啲人鍾意睇溫情嘅戲，有啲人鍾意睇勵志嘅戲，有啲人鍾意睇愛情動作片，至於點樣分配，每個人都唔一樣，亦都無對與錯，所以有啲人倚賴藥物生存，戀上物質生活，唔珍惜緣份，為咗錢而放棄良心都好，其實都唔可以話係錯，我反而會覺得只係一個選擇，當然選擇左就會有佢相應嘅結果罷，不過近排除咗識嘅人之外，的確係多左好多新聞關於猝死同堆渦輪癌症既病例，這是否因為審判之年？對我嚟講並唔重要，因為我並沒有選擇令自己遺憾嘅人生💪🏼😉👍🏼，所以是否審判之年對我嚟講冇乜所謂。

有緣睇到我發噏風嘅你過緊怎樣嘅人生呢，所謂嘅審判之年對你有冇影響呢？