有位友人因為早年與伴侶之間既關係唔多理想，所以選擇咗分開，但經過幾年之後其實仲好掛住對方，新年聚會嘅時候我同佢講其實人與人之間嘅緣份喺自己同埋對方都仲喺呢個世界上面嘅話其實都仲未完既，上年Sparkie既離開使我好深刻咁體會到咩為之真正既緣份結束，就係當其中一方離開呢個世界嗰一刻開始緣份就真正終結，我對Sparkie沒有什麼遺憾，當然總有啲嘢可以做得更加好既。亦因為我早幾年就已經開始有呢種覺悟，所以近年來我最起碼會對果啲我珍惜嘅生命做足自己可以做既野，就算對方點樣自私自利都好，我都會嘗試去挽救大家嘅緣份聯絡一下對方，因為與一個可以交心既生命相遇既機會率其實真係唔高，當然唔係每個人都會珍惜啦，而兩個人之間嘅緣份唔係單方面可以延續落去，亦有可能係我之前做得唔好，對方唔想再見到自己都唔出奇罷😓，但最起碼自己有嘗試過去挽救彼此嘅關係囉。亦因為咁所以我希望朋友可以好好咁選擇，唔好俾自己後悔，因為咋們永遠唔知生命幾時會完結喔！

所有既生命來到呢個世界果一剎那開始，時間就開始倒數，就算俾你可以回到過去，自身既時間都唔會因為咁而長左，都係一個有限期既倒數。而我會形容緣份為自身與其他生命相遇既一個機會率，係一個我哋控制唔到嘅機會率，所以咋們與每個生命相遇既機會率都唔一樣，但由小至一隻蚊螆，去到每日係街擦身而過嘅路人，甚至乎海裏面有一條鯨魚都係獨一無二嘅緣份，因為時間唔會停頓所以未必會有再相遇既可能。作為一個小小嘅生命體既我既唔可以控制時間更加控制唔到相遇既機率，所以我只可以選擇點樣去面對每一份緣份，見到一隻蚊我可以打死佢，撥開佢甚至乎由得佢吸我血，喺街遇到路人撞到自己仲要眼啤啤，我可以鬧佢，亦可以選擇笑一笑繼續自己嘅行程而唔俾佢影響自己嘅心情。所以生命中遇到可以一齊行落去嘅人，就算因為咩事分開咗都好，都可以嘗試去挽救，如果對方唔想再見到自己既話咪算囉，最起碼自己對呢段緣份盡咗力就可以啦，而朋友今日message我並多謝我同佢講既果番話，佢同佢離婚既太太再一次走在一起，而我亦替佢地高興希望呢一次佢地可以好好咁珍惜對方🥰。