雖然聖誕都未到，但因為好耐冇寫Blog，而且今年真係發生左好多事，經歷左好多野，所以早少少回顧一下，對我來講今年最大既沖擊一定係陪左我13年既Sparkie畢業了，呢13年來Sparkie教識我好多人生既道理以及人性與動物性既區別，係2023年Sparkie既心臟病發作之後，從佢嘅驗血報告得知一直以來對佢地嚴格嘅飲食習慣係值得㗎！所以我亦都開始反思自己既生活飲食習慣，同時間睇左好多關於病理及健康論文，如果唔係呢一大堆既資訊，我呢個肥到連姑姐都同我講：『知唔知肥仔姓咩嘢？姓死啊，死肥仔！』，相信我應該開始要依靠糖尿藥及其他藥物至可以正常過活😅，而呢一年我既身型仲要比18歲既自己更瘦，除咗身型既改變之外，情緒心理以至決策既能力都同之前既自己正面，傷風感冒亦都只會一兩日就好亦唔再需要倚靠藥物。呢啲一切都係因為Sparkie教識我，而佢除改變我嘅生活飲食習慣之外，仲提點我點樣去對待緣份，深化同令我對緣份既睇法，同加以實踐。

還記得今年初我要求一定要買桃花同Sparkie影相，仲因為爸爸太早帶桃花入屋所以好早開晒花，要多買一棵，我仲希望可以同Sparkie多影幾年新年照，但生命就係無常，渺小嘅我哋永遠都唔知緣份幾時來到盡頭，早在祖母離開我就開始學識要好好珍惜人生裡面遇到既生命，狗狗那短暫既生命尤其係有病嘅Sparkie就好似每日都在提醒我要珍惜那些與自己有緣既人，就算係對方對自己唔好既，我都會嘗試去珍惜睇吓會唔會係有生之年再相聚一下。當然唔係每個人都會appreciated，可能對方好憎自己又或者我令人好厭惡罷😅，不過係點已經唔再緊要，仲要係自己嘗試過係我與其生命完結之前做左我可以做既野，對方唔領情又或者唔想我再係佢生命裡面出現都唔係我再要思考既問題了☺️，今年就連一個由我中學時代開始既死結我都解開咗啦，誠心感恩。🙏🏼

就係另外Sparkie係Angie生日當日離開我地之後，Angie變得厭世一樣，食欲不振，對外界好似越嚟越唔關自己事一樣，彷彿好似會喺另一個空間咁，所以促使我打擾Celia搵狗仔，亦因為時間既巧合帶左Hugo番來我哋屋企，喺教導Hugo嘅過程裏面我再一次撩起咗爸爸同我之間既問題，一啲由我十幾歲開始埋藏喺心裡面仲會影響到我有情緒病嘅問題，但今次沒有冷處理，而係講晒出來，其實問題未必有解決到，但就好似同其他人既關係一樣，我已經做晒我應該做嘅事，對方珍惜同我之間嘅緣份與否，都唔再係我既功課了因為我已經盡過力去珍惜得來不易嘅緣份。Hugo引發既呢件事，令我覺得好似連最後嘅執着的放低咗一樣，過去一直令個心𢲡住𢲡住嘅感覺頓時釋放咗一樣。

過去既一年再一次令我更深入咁去睇緣份呢件事，係人既一生裡面要遇到另一個自己喜歡既生命既機率真係非常低，有血緣既好，冇血緣既好，甚至只係Internet上面認識既都好，都係一份緣，而因為生命係無常，每次與對方互動既時間並非必然。當一個生命離開既時侯，你幾愛對方，幾憎恨對方都好，大家都永遠唔會再以同樣既姿態見到對方。所以我珍惜同父母每日用膳嘅時間，有時候大家為一啲好瑣碎嘅事係到煩甚至乎吵鬧，又或者媽咪用Henna染髮，呢啲嘅生活係一個回憶，雖然只係好普普通通，但係人生唔係就係咁啦咩？每天一起生活既呢啲回憶係無價，用幾多錢都唔會買得到，就算幾富有都買唔番昨天既時光，更何況係生命係有終結嘅一日？

所以而家好享受緣份比我遇到既其他生命，有血緣好冇血緣好，人又好其他動物都好，我都會用心去經歷，心態唔再一樣，更加確定明白自己點解就算住係幾豪華嘅屋，到世界各地旅遊又或者食盡米星星餐廳都唔會真正開心既原因，因為呢一切都只不過係物質，而物質係帶唔走，包括我哋自己嘅身體都只係借用緊呢個世界上面嘅資源，總有歸還嘅一日，所以重要既係與每一段緣份嘅經歷，好好咁珍惜每段自己真正喜歡及愛嘅緣份，在對方或自己既生命完結之前好好咁去一齊經歷等自己好好咁圓滿及沒有遺憾地去完成呢一個人生。亦因為生命無常，我衷心感恩我返到嚟香港同父母，Sparkie、Angie、金金一齊生活，以及好珍惜我既朋友，及曾經遇過嘅有緣人，無論係好嘅唔好嘅，我都好感謝佢哋，因為呢一切既經歷先至成就到今日嘅我。🙏🏼