由細到大我都好鍾意養寵物，海陸空唔同類型既寵物我都有養過，過去呢幾年我領悟咗個道理，與其話人養寵物，其實同時間寵物們都養緊人，雖然主人俾嘢佢哋食，俾時間佢哋，同時間佢都將佢哋嘅一生都俾咗佢既主人，喺唔同層面上支持佢嘅主人。我地人類養動物，所用既其實都係呢個世界上面嘅資源，表面上好似我買嘢返嚟俾佢食，但係實際上呢啲一切都係地球上嘅資源。某程度上我覺得我只係一個帶領寵物行完成呢個生命周期既領班或者生命旅程嘅同伴而已。

同狗狗相處嘅過程當中其實我有唔少得著，同人類好唔同狗狗基本上冇負面情緒，相反好多人為咗好啲啲嘅物質生活做好多違背良心嘅事，產生好多負面情緒並轉介到其他人嘅身上，但係狗狗基本上見到主人就開心，就算係一啲被虐待過嘅狗狗，佢哋最多只會驚，但係唔會將負面情緒帶給主人。正因為呢一種反差令我好強烈地感受到嗰啲散播負面情緒嘅人對我所造成嘅影響，所以我會盡可能避開嗰啲不斷放負嘅人，真係避唔開嘅，我會嘗試道化佢，可惜嘅係大部份都係事與願違😅

另一樣學識嘅就係所謂嘅人性，好多人將食慾性慾貪戀物件既慾望都歸納為人性，但我有少少唔係好認同，因為當一隻狗狗都會有嘅特性，咁呢啲仲係人獨有嘅嘢咩？最多都只可以講人類都有動物嘅慾望，不過因為我哋係人，所以我哋可以控制自己，而唔係俾慾望控制自己嘅思想罷。

經過10幾年由一隻狗BB養大睇到佢離開呢個世界，我更加覺得一切身體上所需要嘅慾望，並唔係我作為人應該要追求嘅東西，如果唔係當我離開呢個世界嘅時候回想自己就可能連狗狗都不如，我知我唔會因為住過咩地方或者環遊世界而感到自豪，亦唔會因為擁有乜嘢名車名錶珠寶而感到開心，同時間亦都唔會覺得要食過什麼佳餚美酒而滿足，更家唔會因為同個某某有過關係而死而無憾🤣！但我知如果我為左以上既種種而錯過同自己珍惜既人或動物相處既機會既話，我一定會後悔一輩子！