今年五月中至六月中經歷左好多從未有過既經歷，五月中因為指揮既帶挈去咗電視台拍劇體驗咩係夢工場，我第一日開工既感覺係所謂嘅夢工場就好似佢個名一樣，喺入面晝夜不分，因為第一日拍攝既時既背景係日間，而我又坐係廠景裏面近窗口嘅位置，一盞好似太陽咁光既燈照住我嘅左邊，拍攝既過程因為燈光既問題，有種時間錯亂既感覺，第一晚去到嘅時候拍到凌晨三、四點，返到屋企嘅時候已經差唔多凌晨五點，做藝人真係唔簡單，咁樣嘅生活對健康好大影響，如果唔係真係好鍾意拍劇嘅話我覺得真係好難喺呢一行裏面生存。但係呢個體驗係值得既，畢竟一個小小嘅工程師，點樣都唔會同拍劇扯上任何關係。

經過兩日係電視城拍劇之後，5月25號Sparkie離開左我地，由拍劇既好奇興奮，頓時變成沉重悲痛，不過時間好似被好好安排一樣，沒有影響任何工作既時間，而且最後去到善終服務送別Sparkie之後仲要由每日既橫風橫雨更變成天朗氣清，真係上天俾Sparkie及我地一家既福氣，雖然百般唔捨得及悲傷，但心裡面諗Sparkie終於唔需要再受病痛既煎熬啦，我一次又一次感謝造物主給予Sparkie一個唔需要辛苦嘅離開，因為Sparkie一直都好生性幫左我同我屋企好多，但係每次天氣轉變嘅時候，佢唞氣就會變得好辛苦，每每咁樣我都會抱抱佢同佢講如果撐得太辛苦，唔好撐，每次我講完眼淚都不停流落嚟，直至現在我一想起既時侯我依然控制唔到淚線既分泌，我真係好唔捨得！

唔知係好彩還是係不幸，Sparkie離開之後，仲有好幾天拍攝工作需要進行，因為應承咗人，我唔想搞亂劇組人員嘅安排，所以我照去出席拍攝工作，將自己嘅唔開心盡量收起，同時間因為需要拍攝工作及自己既工作令我冇咩時間比自己唔開心，當然一返到屋企入到自己房嘅時候眼淚就不期然流落嚟。相信沒有Sparkie嘅啟發，令我用咗過去呢一年時間去改變自己嘅生活飲食習慣來去做呢個準備我諗我可能真係過唔到呢一關。過去幾星期我領悟到好多道理，好慶幸自己嘅選擇，感恩造物主給予我與Sparkie既呢一段俾好多人更有人性既13年關係，亦感謝Sparkie來到我地屋企！