尋晚去完樂團排練，回到家中已經冇左Sparkie招牌式既打招呼，嗰種唔再需要忙著放低所有嘢去應酬Sparkie嘅感覺令到我覺得有啲冷清，佢已經走左一個星期，就好似為過去呢十幾年做左個總結一樣，對於Sparkie既一生來講我當然有可以做得更好既事，但畢竟我亦有自己既事忙，所以我冇覺得有咩要後悔，同時間我真係好感恩，Sparkie自從六歲就被診斷出有心臟病，基本上冇咩可以做得，亦唔關Breeder事。來到佢十三歲，仲要走之前仲玩得食得，排泄都完全冇問題，走既瞬間只係以秒計之間嘅事，而且係自然走，其實真係佢同我地這家人既福氣。

過去幾年出現過啲令我感到好失望好沮喪既朋友，雖然當時唔係好覺但而家諗番起來真係唔少影響，可能人家從來無當過我係朋友，只係因為自己太天真，幸運地係人生裡面有一段同Sparkie交集既經歷，令我學體會到狗真係比好多人更有情有義，同埋咩係真正無私既愛，而唔係果種只掛咀邊既發噏風。由其係上年Sparkie病發，我更加體會到金錢真係永遠都買唔到一齊相處既時間，更唔好講有啲人只係為左一時間既欲望，當然有啲人永遠都不能理解，到最後可能連後悔既感覺都無，只會把所有嘅錯怪罪其他人身上。對於呢啲朋友我冇任何後悔，因為我已經做晒可以做嘅嘢，而Sparkie係其中一個原因令我好明白點解要珍惜與其他生命既關係，所以我寧願自己做傻仔都唔會想自己後悔，好多時都希望自己睇錯人，可惜嘅係事實就好似我直覺一樣咁樣發生而令自己受傷，最終亦明白對方其實並不太珍惜彼此嘅關係。

緣份到嘅話可能會再多養一隻狗，但我唔打算找Sparkie既代替狗，因為每個生命都係獨立嘅，沒有另一位可以取而代之，就等同於我同其他嘅生命相遇一樣，我感恩及珍惜Sparkie帶俾我一家既所由經歷，所以我會好好享受餘下嘅人生，唔係為咗金錢或者慾望，而係好好咁嘅體會每日同其他生命嘅相遇同交集以及當中嘅悲歡離合生離死別甜酸苦辣，因為生命完既時侯，我哋真係冇嘢可以帶得走嫁，就算有天堂又好或者有來生都好啦，都已經唔再係今日嘅我，而這就是生命，希望有緣睇到呢個無聊Blog既你都可以好好享受呢個遊戲。😘