2024年5月29號過去幾日天氣都好差，加上Sparkie啱啱離開咗，雖然我明白Sparkie走唔係一件壞嘅事，因為佢真係冇乜痛苦咁離開，加上其實死亡係冇可能避免，但分開一定唔會開心，我自世就討厭道別，所以心情極之麻麻，直至下晝1:00父母Angie、Sparkie既朋友同埋我一齊去到TLC寵樂緣送Sparkie最後一程佢講拜拜，一個正正式式嘅道別之後心情先有啲舒緩。

我好明白咩係Circle of life，所以冇咩特別嘅儀式，只係送一位好朋友最後一程，希望佢開開心心咁上路唔使再唔舒服，Sparkie最後一次沖乾淨涼，有佢好喜歡既Darth Veda T-Shirt好靚仔笑住咁樣走，Angie見過Sparkie之後迷惘嘅眼神消失咗，佢明白Sparkie已經走咗。我一次又一次多謝Sparkie，唔係因為Sparkie我真係好難正面咁去面對返到嚟香港所遇到嘅人同事，喺Sparkie身上學識物質只係我要來經歷生命既燃料，而唔係生命要追求嘅嘢，金錢可以搵得返嚟，但一齊經歷嘅時間係錢永遠都買唔到既呢個定律。

未試過呢一種Bonding既人，係永遠都唔會感受得到，當我見到一隻小狗可以為其他生命付出自己僅有嘅時間、食物及玩具，更唔會因為動物性既需要而作出禽獸嘅行為，我真係好好咁反思過所謂既人性係咩一回事。亦因為Sparkie所以我好明白一啲只係追求物質生活嘅人唔可以做朋友，而最後嘅事實亦都證明係咁，就好似有啲人拍拖既時侯同伴侶講一生一世白頭到老，朋友之間兩脅插刀，其實只係發噏風嘅說話，有啲人其實真係連同狗比較既資格都冇，所以真係好慶幸Sparkie比我學習到呢一切，因為咁我好清楚地去同呢啲人劃清界線。同時間亦都見到邊啲係真朋友，所以好感謝過去幾日不停慰問我嘅朋友包括一啲因為我改咗電話搵唔到我email我嘅朋友，真係好感恩仲有你哋喺我嘅身邊，至於嗰啲喺我生命曾經發噏瘋嘅朋友不提也罷了，最後亦都好感恩Sparkie走左之後太陽就開始出嚟照住我哋，讓我們感受到溫暖。🙏🏼