出去買完Lunch返到沒有揈晒尾嚟迎接我嘅Sparkie既屋企，見到沒有Sparkie身影既豆豆袋，已經唔會再用佢嘅舌頭嚟整蠱我，已經冇得再摸摸佢，一切來得非常之突然，好似發緊惡夢一樣，幫左我同教左我好多野既Sparkie今朝凌晨4點50分突然起身『喔喔』左兩聲就離開左我地，尋日Sparkie同Angie仲一齊搶雞柳食，仲想非禮Angie ，仲落去行街街，跟住同隔離屋院既波波打招呼，昨晚我返到屋企佢同平時一樣會出來歡迎我，完全沒有上年佢入醫院前後既情況，完全沒有辛苦既唞唔到氣，離開之前幾小時佢仲自己去小便，但就係走得好突然，當然父母同我都喊晒，但係生命總係有完既一日，所以我地至需要珍惜所有生命，因為我由養佢第一日開始我就同自己講Sparkie錫我同陪我玩唔係必然。

生命就係咁無常，我地一家真係好福氣有Sparkie來到我地既生命裡面經歷呢十三年，佢幫左我地屋企好多好多，教識我要好好珍惜身邊既生命及怎樣為之享受生命呢個旅程，兩晚之前我揸車經過日出康城，仲諗起最初朝帶住BB既Sparkie做Training，教佢點樣跟住行，點樣學Tricks，點樣唔好係街隨便執嘢食或者跟人哋走，跟住我返到屋企，Sparkie仲歡迎我，我仲多謝佢陪住我地，讚佢乖！點知過咗兩日咁就走咗啦，但同時間我真係好多謝佢亦好感恩，俾我同佢有段咁既經歷。自2015，2016年開始我經常都多謝佢，因為我明白每一日既窩心，一齊跑下行街躺喺我心口攤大個肚瞓覺，當我人生不如意既時侯，遇到啲衰人嘅時候，病既時侯Sparkie陪住我都唔係必然，所以我一直都好多謝佢，佢另我學識感恩，咩係Unconditional Love，咩係珍惜，咩係動物性，咩係人性，甚至因為睇到佢上年既入院驗血報告之後令我明白飲食同生活習慣既重要性，從而改變自己既生活飲食習慣。以及做事要做就去做，唔好等，因為時間不留人。

經媽媽朋友既介紹我今朝聯絡左寵物善終服務公司，佢地今朝8點41分來幫忙接走Sparkie，來準備好好咁同佢講聲再見，我覺得呢個係我可以為佢做既最後一件事，我地一家當然唔會開心，就連Angie都沒有了女王嘅霸氣，但同時間我地對Sparkie亦沒有遺憾，某程度上仲替佢開心，因為心臟病係佢天生嘅病，最後佢咁樣走，其實唔算辛苦，時間好短，佢走嘅時候仲好溫暖，父母同我亦係佢身邊。

生命永遠都冇人會嫌佢長，多得一日總係希望可以多一日，但Sparkie使我明白生命唔係在乎長短，而係當中既經歷，佢係其中一個令我深深明白咩係人生既生命，佢帶俾我既愛，令我明白物質係帶唔走，同自己想要既係咩野，雖然Sparkie走左，但我會緊記同佢一齊既回憶同佢帶俾我地一家既一切，感恩佢來到我地既當中，再見啦Sparkie，多謝你LOVE YOU!🙏🏼