早前我主動提出唔再教一位跟我學習大提琴既小朋友，因為我真係無理由要教埋佢父母，最初佢來上堂既時侯，佢無禮貌地掟stopper落地，來到上堂既時侯總係掛住玩其他野，上堂既時侯用琴弓撩我部琴，叫佢唔好呢佢都要撩下我個endpin，最初幾個月見到佢咁樣我覺得好怪，因為我細過既時侯如果係餐廳多手搞啲鹽同胡椒粉嘅樽都會俾人鬧，喺我屋企禮貌係好基本嘅嘢。不過我覺得家庭背景總有分別，所以我好直接問小朋友係咪唔喜歡拉琴，但佢又不斷否認，就係咁過左幾個月，教學中心有一個小朋友既演奏會邀請咗佢去表演，小朋友媽媽好雀躍想個小朋友參加，我為左小朋友不必要既出醜同唔好既經歷，所以我就幫佢拉伴奏，同埋係短時間裡面盡量幫佢去練好表奏既樂章，好等佢有個好既回憶，然而演奏會佢係開心嘅。

但就係演奏會結束後，小朋友對於課堂就變得越來越懶散，上課後回到家中練琴，明顯地只係玩玩就算，好好地同佢講咁樣練琴唔可以呢，佢就同我講話：「爸爸話拉大提琴係好容易姐」，所以小朋友有種錯覺唔使點練琴咁，而之前教嘅嘢好似完全唔記得晒咁，所以上堂要不斷重複又重複返之前教過嘅嘢，其實咁樣都唔緊要，最奇特係同佢一齊上課既媽媽竟然問返我：「又要練返之前啲嘢啊？」。後來既課堂越來越唔對路，小朋友用自己喜歡既方法拉琴完全唔聽講，拉到握弓既手指痛，教左方法俾佢改善，佢完全唔跟。所以我嘗試同佢媽媽溝通，就開始發現好多問題啦。

首先小朋友惡意掟Stopper，遲到上堂要食嘢，撩老師部琴，媽媽基本上每次都在場，而且媽媽話小朋友同佢都覺得係唔啱，不過媽媽就話佢鍾意咁做都冇辦法，跟住媽媽仲要同我講小朋友學唔學大提琴佢冇乜所謂。之後佢可能知我唔想教佢位小朋友，突然間每晚11點send六至八段小朋友練習既短片俾我，連續差不多一星期我每日都逐一睇完之後講俾佢聽有咩地方有問題及需要練習，不過媽媽就係無回音，直至上堂嘅時候，小朋友都係拉緊錯嘅嘢，原來小朋友完全無視我嘅評語，小朋友嘅解釋係媽媽話：「老師冇拍片叫佢點練，所以唔識」，呢位媽媽仲要叫個小朋友連續練左三個鐘頭錯嘅嘢，我倒問番佢地唔明我既評語點解唔WhatsApp我呢？佢地又唔答我，真係暈都頭🫨。

最後我決定唔教呢位小朋友，唔係因為佢拉得好與唔好，而係因為佢父母既態度，我通常都會邀請父母或者監護人一齊上堂，因為等佢哋可以知道小朋友返屋企要練習啲咩嘢，不過呢位小朋友嘅父母連小朋友上堂唔禮貌都唔理會，有次爸爸媽媽陪個小朋友一齊來上堂既時侯爸爸甚至對住我瞓覺，雖然佢唔係好尊重我，不過都唔係我唔教佢位小朋友嘅理由，主因反而係小朋友嘅媽媽同我講話小朋友學唔學大提琴佢都冇所謂以及加上佢媽媽推搪責任嘅態度，正正解釋咗就算我幾有心機去教呢位小朋友都好，佢父母嘅態度令我好難教好呢位小朋友，所以我選擇唔教呢位小朋友。同時間真心希望小朋友既父母有所成長！