因為要做自己喜歡既工作、Webinar、學琴、義教，樂團排練我都好耐都冇寫過blog啦，常言道人生如戲，但我倒覺得人生如遊戲，所謂嘅我只係一個借用大地資源而享受呢個名叫人生遊戲既意識！人生呢個遊戲我可能之前已經玩過，而家玩緊嘅遊戲亦都會有完既一日，亦有可能將來會再玩過。但無論係點現在既我無前生既記憶，我亦唔知仲有冇來生，不過就算有都肯定唔係而家呢個我，所以就算我係呢個遊戲裡面得到幾多金銀珠寶，甚至乎係Endgame既神器都好啦，當遊戲完結既一刻，我既所有包括身體都要歸還俾呢個世界，有機會可以帶走嘅，極其量只有遊戲裡面嘅回憶。

時間已經來到四月，Sparkie已經賺咗一年多嘅生命，佢依然會每日都纏住媽咪同埋我，每日都會行下街，會玩會吃會瞓！而我近日亦都同一位自己好希望有機會同佢一齊拉管弦樂團既朋友完成左場演奏會，同朋友上台拉琴嘅經歷真係好享受🤩。另外自年初開始我好好彩喺唔同既樂團裏面遇到幾位好好嘅前輩以及給予演奏嘅機會，學到好多拉琴上既技巧同埋知識！再加上過兩個月我就完全改變左生活飲食習慣一年啦，呢大半年除左身型既改變之外，因為情緒能力都有不同程度既轉變，真係好感恩，完完全全係受到指引一樣！確定人生唔一定係為左食玩瞓屙，而係確確實實咁去經歷同體驗。經過左咁多年既人生，早幾年我開始懷疑人生可能真係只玩食好的，玩嫖賭飲蕩吹既，因為接觸到太多人都係呢類以物質為人生目標既人，縱使英國生活期間教識我做人唔應該係咁，但回到香港，身邊出現比較近既人都係物質享受主義者居多，佢地唔會正式講出口，但做出嚟嘅行為係就將嫖賭飲蕩吹視作為做人嘅王道一樣，其實都冇咩錯唔錯，但係我就係完全唔識享受呢種生活嘅白痴🤪。

經過接近呢一年既改變，我意識到作為一個人其實我哋需要嘅嘢其實唔係好多，食嘢唔一定餐餐都要美味，住嘅地方唔需要奢華只要寧靜整潔，穿着嘅衫其實乾乾淨淨同埋睇場合就可以。與其浪費時間喺一啲要用自己健康嚟埋單嘅活動上面，我會選擇早啲瞓，陪吓家人同一啲有共同價值觀既朋友飲杯咖啡或者聚餐，玩吓遊戲其實已經好開心，我享愛既係簡單嘅生活、複雜既工作同父母以及一啲真正嘅朋友咁會過每一日就係我係呢個遊戲裏面想得到嘅回憶。

眼見呢十幾年曾經同我擦身而過既人，冇必要地東奔西跑，犧牲自己健康浮浮沉沉，因為唔同嘅理由去污染自己嘅心靈，我真係覺得自己好好彩，亦真係應該要好好多謝Sparkie、Angie同啊金！我係呢個遊戲當中完完全全感受到自己是一個得到眷顧既存在喔！🙏🏼