今年係豐盛嘅一年，首先經歷疫情令我用上自己喜歡睇論文興趣，而睇左一堆唔係本科既論文，從選擇打唔打疫苗乃至半年前開始改變自己整個生活飲食習慣，我發現原來自出生以來，我既生活飲食習慣一直被誤導，而身體正一步一步要變成靠藥物同醫療支配才得以存活既個體，最恐怖嘅係原來舊有嘅生活飲食習慣係會影響埋情緒以及思考嘅方向。經過這半年既改變，身體周期性嘅炎症或痛風完全消失，耐不耐既頭痛近四個月無再出現過，負面既情緒變得可以好快提醒自己再振作起嚟，精神及工作能力提高左超多，唔再好易累既感覺，晚上瞓覺十分鐘內就開始熟睡，身形完全改變比18歲既自己還要瘦，由懂事就已經有既肚腩開始變成三舊肉，真係好感恩感受造物者既偉大，身體簡直就係重置一樣！如果唔係咁樣既改變，想信我過多幾年都要食糖尿藥到最後仲可能需要洗腎或者換腎，仲應該會有肝臟肥大，心血管問題！唔係自己經歷我都唔會相信可以有咁嘅改變，年頭自己平均心跳都每分鐘80幾，而家變到50至60，真係好神奇！

第二件事當然係Sparkie心臟病發，令家人同我好好咁上左寶貴既一課，無論係對於生命既珍惜以及自己既健康，選擇咩對自己重要，咩係開心，咩係自己既人生。好感恩Sparkie今日仲可以陪伴係我地既身邊，我好有福氣可以有佢地呢幾個Monster同伴係我人生裡面陪伴我。

第三件事呢開始身體力行去義教小朋友拉大提琴，好感謝我老師教我點樣教學生同鼓勵我去義教，過程之中我都有唔少既領悟，見到學生努力練琴，其實就已經係一個好大既回報！

第四件事終於真正擺脫左對於果啲唔會珍惜彼此關係而引起心中糾結既傢伙，一直唔想單憑自己既感覺去判斷一個人，所以令自己心中一直都有糾結，怕自己睇錯人冤枉人！但係呢啲曾經令我糾結嘅傢伙，因為佢地所作出既回應正正同我心中所想既不謀而合，所以對我來講係一個直正既解脫，完完全全地放下。因為唔好話重拾舊好，因應對方既態度同回應既方式，我諗見到面都應該會不相往來罷。

最後遺憾係朋友嘅親人離開咗，生命無常，今日喺度唔代表聽日喺度，雖然好細個就已經明白呢個道理，但係聽到呢啲事總係擺脫唔到心悒嘅感覺。

總括嚟講今年經歷同體會左好多，但時間比雷射更加快，證明我應該過得好開心仲記得上年呢個時間應該係全家病發Covid既前後，爸爸聽姑姐清溫之後既喪屍樣，我而家仲歷歷在目，真係好彩佢今日依然健健康康去打草地滾球！

正正因為身體既改變，我2024年要更努力💪🏼去經歷，體驗呢個人生👍🏼