我覺得自己係一個好有福氣既人，細個因為阿爺呀嘛姑姐既關係住過2萬尺既豪宅，坐佢地既波子拉利，食得豪又可以買貴既玩具，耐不耐就見到唔同既歌影視偽人同名人既Party，甚至十一、二歲就已經去18+既夜場。不過我覺得自己好有福氣唔係因為經歷過呢啲生活，而係可以睇到呢啲生活得到既係點樣既人生，因為過程令我好明白物質唔代表一切，就算有幾靚既大屋，幾豪華嘅靚車，食盡天下美食遊歷世界各國，咁樣唔代表自己人生得到滿足，人總有離開既一日，我早早就明白物質係帶唔走，但人生係享受過程既一場遊戲，選擇成為一個點樣既人經歷先至係重要。有人選擇做一個爛人，有人選擇做偽人，有人選擇自欺欺人，有人選擇自high，有啲人選擇狠人，對我來講呢啲都無對錯，因為呢啲都只係個人選擇而已。

但係呢，我呢一兩年學會無必要強迫自己同一啲孽重既人一起經歷人生，舊時我會對一同成長既人或自己真想好好珍惜既朋友帶著一種蒙蔽自己雙眼既情懷，對於自己唔認同既事都會隻眼開隻眼閉。因為無論你附出幾多都好，有啲人永遠都唔會珍惜。唔好講情侶，就算只係朋友之間如果有問就選擇逃避既人，其實真係無必要糾纏落去，因為就算過幾多年都唔會有咩大分別。原因係愛我者惜之，厭我者棄之，要是對方珍惜既話就會一同解決問題，時間以及經歷令我好好體會得到呢樣野，過了多年後當對方唔再需要自己既時侯，我既一句關心問候都可能變得難聽過粗口！

我既結論係，每個人都有佢自己既存在目的，就好似有啲人選擇人生窮得只有錢（成功既商人就是要狠），有人選擇要做一個為性而做人（有異性冇人性），當然仲有好多種人，但呢啲人都有一個共通點佢地既孽好重，我而家會盡量避免同呢啲人走得太近，因為我唔想捲入呢啲人嘅因果之中，而呢一個正正就係我既福氣！