番睇十幾歲既時侯寫既日記，全家親戚一齊食飯既時侯姑姐既男友講到做人父親應該要對自己既仔女展示愛嘅表現，爸爸極之唔同意之餘並好自豪地對住全枱既人講為父之道應有既原則，並且用佢點樣對我作為例子來回應，當時爸爸話：「我從來唔會搭住佢個仔既膊頭而且永遠都唔會，做人爸爸點解需要做呢啲野啊！」果一刻我當然係非常之心酸啦，要知道雖然我算一直覺得自己爸爸對姑姐個仔既態度仲好過對自己，但真係無諗過佢會當眾係自己個仔面前用咁既說話來炫耀父親既權威。

其實我細過既時侯爸爸都唔係咁，但自從我二年級左右啲親戚們開始富裕起嚟之後，由爸爸可以揸一架價值等同一間康怡花園既波子果時關係就開始改變，從果時起爸爸基本上同我都沒有什麼對話，當被親戚們投訴嘅話我會被打啦，亦試過將我嘅玩具全部棄置到垃圾房啦，仲記得當年要準備考公開考試既時侯，因為唔想陪爸爸出去應酬而吵架，係英國讀書打電話番屋企如果係爸爸接電話既話，佢除左叫我等等就係話你mommy唔係到，從來沒有第三句說話，當然呢個局面同我一位親戚都有啲關係既。而爸爸有事找我既話都唔會直接搵我，而係經媽媽轉達。

係英國果段時間親戚們既冷漠，以及想幸災樂禍嘅態度令我心寒至極，最可笑係有啲親戚好似關心我而問起我既近況，但當媽媽講俾佢地知我係英國都十大之內既大學就讀並取得獎學金之後就冇人再問我既近況甚至dead air左，慢慢我都開始左習慣自己生活遠離呢啲就算我過時過節Email(啲email既副本仲存在喺我email Account🤣)佢地都唔會回覆既親戚。

對於呢啲事我表面上好似放低左，因為人在英國好似唔需要再去面對，但其實一直都耿耿於懷，亦本來都冇諗過番來香港，還記得當日我去左有Magic Roundabout既Swindon，媽媽打俾我同我講話爸爸要我返香港，我當時正正考慮緊一份同軍方有關既工作而參加之後幾年都唔可以返來香港，談話中媽媽話爸爸改變左好多，同以前唔一樣，因為咁我再一次返左來香港。

最初返到香港，爸爸對我既態度係有啲唔同，不過經過大慨兩個月左右，就開始變得比我過英國前更難相處，大家就算同一屋簷下，爸爸出街都唔會講聲，但會突然好大聲閂門“BOMB”一聲就出左去，當我同媽媽講緊東既時侯，爸爸會插咀講西，跟住當我想問清楚佢想講咩既時侯，佢就會發脾氣之後就會拋下一句：「我唔講喇」。甚至有一次因為我唔想去姑姐家食飯，爸爸發髀氣用力周圍閂櫃門，好似想斬我一樣。果次之後，我好大壓力，我盡可能唔會咁早返屋企，盡量避免留係屋企，有些時侯為左唔想咁早返去而選擇行番屋企，試過行到半夜一兩點鐘至返到去，後來事情變得嚴重咗，我返到屋企大閘我就會反胃嘔吐，我知道唔可以再係咁落去。果一刻我知道我情緒好有問題，必需要面對，果段時間我冇人可以傾談呢啲問題，包括自己既媽媽，因為講左都只會係當我只係發洩情緒，唯一幫左我既係我最好既同伴Sparkie以及睇書拉琴，如果唔係有Sparkie我應該要食藥同離開左。😅

不過因為咁既經歷令我明白所謂愛其實係愛為愛既人付出，而不是單純喜歡上一件物件或偶像，就算口講或心底裡面有幾愛都好啦，問一問自己如果你愛一個人，你為佢付出左幾多？而作為一個小小既人類，我天生下來就不是被愛，就連我初生既時侯，我祖父都唔會去醫院見見我呢位所謂既長子嫡孫，我亦唔可能要求自己既父母愛自己更何況係其他人呢？！因為這實在不是必然的，但我可以選擇放低果啲唔愛自己既人而去珍惜果啲愛自己既人。想通了返而輕鬆左好多，可以好積極咁去做自己想做既同過唔會令自己後悔既人生。如果唔係返左來香港，我永遠都會有解決唔到嘅遺憾同心結，而一生後悔。所以來到呢一日，父親大人依然會無啦啦發脾氣，就算係日常家人既對話，爸爸都係晦晦氣氣，我可以做既就係唔好被佢既情緒影響到保持距離，因為我明白用這種心態過活好易使自己咩都做得唔好，更加令周圍既人都好難受。不過唔係因為咁我又唔會有所領會。

人天生是否被愛其實唔緊要，只要自己懂得愛人就夠， 因為幸福既不是被愛既人，而是懂得愛人既人。