當年因為太婆係我生日當日離開左我地，從此我盡量都唔想搞什麼生日，不過今年我諗通左啲野，”Do not pity the dead. Pity the living.” 我應該珍惜還可借自己生日與在生而珍惜自己既家人朋友相聚一下，但並不是為慶祝自己既生日，而係慶祝自己生日呢一日仲有佢地係自己身邊。

兩個月前Sparkie出院返屋企個晚，因為佢真係好弱，所以我去左父母房瞓陪住Sparkie，諗番起好多自己細個既回憶，另我問起自己，人生其實需要既係咩？返到來香港我覺得香港好多親戚同朋友都好complicated，久而久之就越來越習以為常。但近幾年世界所發生既事，自己屋企所經歷既以及同一啲朋友既磨擦，使我好認真咁去反問自己想做一個點樣既人同點樣既人生。

我有段時間都好想問清楚果啲曾經令自己唔開心既人點解可以為左自身利益或自我感覺良好而將對錯分明既事實扭曲至是非黑白顛倒既地步，不過我已經覺得唔再重要，經過呢啲事反而使我學識左唔好因為大道理係自己呢一邊又或者為左人地好而諗住向對方說教講道理，因為每個人都有佢既考量，所以果啲為金錢捨棄人性，為性欲捨棄朋友既人又點會因為我既三言兩語而改變佢早已扭曲既人生呢？

我唔係一個被家族所期代而來到呢個世界既長子嫡孫，就算當爸爸同爺爺講我已經出咗世，我啊爺都唔會去醫院睇下呢一個剛出生既孫兒，長大既時候我啊爺總係喜歡用表哥個名來召喚我，我有好幾次係忍唔住問佢點解要用表哥個名叫我，爺爺就會講啲唔係理由既理由來矇混過去。後來我要離開香港讀書，果段時間親戚們好主動地避開我地一家，其中一個本身同我媽媽好Close既親戚好大可能怕我媽問佢借錢（我媽跟本無諗過要問親戚借錢），所以佢私低下分別地對住我媽話唔應該俾我返英國讀書，打電話同我爸爸講話我媽媽唔識做人娘親，趁我父母都唔係附近就對住我講話我爸爸唔生性要玩車使左好多錢，難為我媽媽，所以叫我唔好返英國讀書！因為佢既幾句說話搞到我全家人關係超差，爸爸與我不在話下，連媽媽與爸爸既關係都唔見得好，英國讀書生活既日子只有媽媽會同我通電話，我打番屋企爸爸接電話只會講你等等，或者你媽唔係到。當然親戚呢啲三八行為唔只一兩次，我屋企亦唔應該怪責呢啲親戚，畢竟我哋都係獨立個體有自己嘅思想，但影響就一定有，亦唔細！

十年前返到香港，我嘗試放低成見，參與呢班親戚既聚會，不過就好似果啲為錢為性既朋友一樣，親戚們對於人生理念、道德及物質生活既睇法同我呢個死肥仔既分歧太大啦，所以最後我都係選擇同佢地保持距離，盡量都唔會出席親戚既聚會，加上係英國十幾年裡面大家都完全冇聯絡，不過就好似媽媽講既咁，如果有人對自己唔好，咪行開囉，冇必要令對方難受，而我會加多一句，被人摑左一巴，冇必要企定係度俾人再摑姐，係嗎？😅

所以正正有呢班人同埋呢啲經歷，至會有今日既呢個我，雖然咁樣講好似好sacasm咁，不過我真係好多謝呢啲人令我知道做人最保貴既係乜嘢，今年生日前我冷親，但因為爸媽喜歡食@holam_bakery既榴槤千層蛋糕多過M姐既蛋糕，所以我就算知道自己唔應該食都訂左榴槤千層蛋糕返來，好好彩食完又冇咩大問題，我真係好好彩仲有父母同佢地係我身邊陪我過日子，更令我明白，唔係因為人大左而唔追求，而係因為已經有我最想要既野。

其他有同冇其實冇咩所謂 ☺️✌🏼