係#youtube睇到#joehisahi2022年一個Concert裡面既幽靈公主FullSuite。令我諗起舊時同Alan每星期一齊排練，排練之後講解幽靈公主既故事佢聽，教佢點樣唱so fa name。 其實都係一段回憶，人生遇到唔同既人都有唔同既回憶就好似係英國既時候同Jaffrie一齊打Ranking。經過這些年，我深深體會到因為每個人既生存目標都唔同，所以珍惜既野都唔一樣，冇話啱或者錯，但我到而家都理解唔到果啲為錢為左性為左物質而出賣或者放棄自己、情人、家人或朋友既人係點樣面對自己，唔通真係自我感覺良好向前看就可以？

俾你搵到幾多錢都好啦，可以買到過去既一秒嗎？再唔係俾你有你最想要既對像與同床就可以同夢嗎？又或者俾你有好多好靚既大屋住就會真係開心嗎？我唔知其他人係點，但我只知自己唔會咁樣而開心，我唔係唔食人間煙火，而係同咩人食好重要，大家啱傾啱講既人唔易遇到，要是遇到一個會珍惜彼此關係既更加唔易，好彩我人生當中都有呢啲朋友，不過真係唔多。

過去一啲日子我好天真咁諗，只要我對人真誠，或許對方會有所改變，事實好遺憾我不能改變任何人，我應該相信自己既直覺及所看到既事實，而不是相信對方既謊言。不過我都冇後悔既，因為我明白要向前看既話，起碼我曾經盡力付出過及做了我所能做既事。要是自己冇盡力又或者冇面對及處理自己嘅過失既話，我永遠都唔會可以向前行，向前行左既只會係自己既光陰，以及越來越冇得彌補既後悔。