友人C同我講佢鬧佢個前男友：「你都唔係男人來嫁！」，原因係佢前男友做錯事連正正經經同人道歉既勇氣都無，亦唔會好好面對自己搞出來既問題。其實友人C同我好少見面，但佢每次劈腿，佢都會搵我傾吓偈，當然佢私底下同前男友既事我就不便多說，只係我學識左樣野，原來女仔會咁樣睇男仔，咁其實得罪啲咁講句，我所識既香港人當中好都好多係唔會同人道歉，大部分都係自欺欺人，自High，自我感覺良好，往往都係等時間過左去就算而唔會道歉既人。如果用友人C既邏輯咁我好多男性朋友都唔係男人來。🤣

根據自己既經歷，係英國生活同係香港生活確實係有啲分別，英國撞倒人或被人撞倒，啲人講Sorry既比率係比香港高，當然英國都有啲好Rude既人。但好似香港咁，你幫人開埋門仲要用怒火眼睛射住你既人係英國真係冇見過。

當然呢啲都係性格問題，只係香港呢類唔肯認錯既人比較多就係，好似我係香港去電腦鋪頭買野，成日都遇到一啲Top Sales，佢地自認不凡，一定係行內最Top咁，我問佢地有冇賣咩咩Card咩咩 CPU咩咩SBC。好多時都話冇，仲要肯肯定咁同我講廠商無出過，最慘係佢地公司有得賣佢地都唔知，都好幾次我求佢地去Check Stock至發現原來有貨，跟住扮傻扮唔記得，總之就係唔會簡簡單單同你講聲Sorry。🤣

友人C既睇法remind左我，可能有時只係好少既事，但如果係錯就要認，唔係為左唔想俾人話唔係男人，而係作為一個人有錯就要有勇氣去承認！😉👍🏼