上星期三有位私底下從來都冇聯絡過我既前樂團女團員搵我，原因係佢知道我同L哥係親戚，確定L哥同我係老表關係之後，佢就問我一啲有關L哥同我之間既事，跟住佢就同我講L哥點樣斷斷續續騷擾左佢一年多，初時女團員以為佢只係口花花，但係近期仲誇張到暗示叫女團員去開房。要知道呢位女團員係有美滿既感情生活，而L哥亦都識得佢既伴侶。後來女團員更加發現原來樂團裡面既受害人唔止佢一個，所以佢同L哥既老師投訴，不過L哥既老師覺得如果L哥真係太纏繞女團員既話，佢至會幫佢地，但係纏繞嘅定義有啲含糊，所以件事對女團員來講係處於膠着既狀態。

同女團員交換有關L哥既資訊之後，女團員同我都發覺事情越來越唔多妥當，L哥好似漁翁撒網式咁係樂團搵目標不論單身或人妻都唔放過，彷彿樂團就變成佢嘅交友Apps同時提供女團員俾佢搵目標一樣，咁樣好大問題皆因大部份人都唔係帶住去酒吧識人既心態去參加樂團，大部份團員都只係為左去夾琴呢。對於被騷擾嘅人來講，每星期都見到騷擾自己嘅人一定唔會好受，鬧爆對方大家又無癮，再加上賤男講野果種曖曖昧昧既表達方式，就算受騷擾嘅一方發晒脾氣，賤男都可以好賴皮咁矇混過去。

然而L哥同我已經超過一年冇聯絡，再加上早係兩年前我已經同L哥傾過好幾次佢係交友Apps上面識人既底線問題，當時我地講到接近鬧交咁既局面，而我同佢既底線與及對於事情對錯既定義都有頗大出入，所以我唔覺得可以經過我同L哥再次交談會得到任何結果，我亦只可以應承女團員，如果L哥再騷擾佢嘅話我就搵L哥既爸爸傾傾。

不過經過一晚嘅思考之後，我喺度諗其實女團員如果唔係冇辦法都唔會同我聯絡，如果我由得呢件事不了了之嘅話其實就係L哥嘅幫兇，所以星期四我就徵詢女團員既許可後決定搵L哥既爸爸面談同埋及係Black Friday搵樂團嘅負責人交代。

跟住上星期四下午我見咗L哥嘅爸爸，當時因為L哥嘅媽媽經核酸檢測剛剛確認為Covid-19陽性，所以雖然佢媽媽唔係舖頭，但都我要隔住膠片同佢爸爸講晒成件事，並且叫佢勸L哥唔好再去樂團，首先就算L哥真係改過都好啦，要果啲被佢騷擾過既團員，每星期都見到佢一定唔會好受，更可況L哥都唔一定會改過！L哥嘅爸爸聽完之後都好無奈同惆悵，我更加從L哥既爸爸口中得知原來我當年幫L哥係英國借錢係佢爸爸幫佢還而唔係佢自己還，我真係俾佢呃得耐👿同時亦都好抱歉要將啲咁既事講俾L哥既爸爸知。☹️

到左上星期五，因為唔想將L哥騷擾團員嘅對話截圖傳來傳去，所以我一起身就約咗樂團嘅負責人喺下晝見面，見面時我好直接咁同負責人講左L哥騷擾團員嘅事，以及我既體法，佢地基本上都不能接受L哥既行為。

不過呢啲事點睇法有時可以係一線之差，畢竟各團員都係成年人，但係L哥過份既地方係受到佢騷擾嘅團員，其私底下冇同L哥有任何交往，有啲仲要係L哥明知道人地有好穩定嘅伴侶之下都去騷擾人哋，佢利用人哋唔想做衰人呢一點來去不斷纏繞對方。另外呢如果女團員係同L哥玩玩下既話，就唔會向一個已經冇去樂團私底下亦冇聯絡嘅男性求助啦😔。

老實講我都覺得自己唔係咩正人君子，但都有一啲基本既道德底線，真係冇諗過L哥會咁癲將樂團當成交友Apps咁利用，無分寸地周圍撩人，完全唔識尊重其他團員，雖然我冇實質既責任，但多多少少都有關係，始終係我帶佢入團，對於有團員被滋擾，我係好唔安樂同過意唔去，所以我立刻改左自己既日程表，盡快處理呢件事，至於L哥既結果係點就輪唔到我去管，跟住我本來以為件事已經告一段落，點知當我同樂團嘅負責人傾完離開之後，當晚L哥居然仲以Covid-19密切接觸者嘅身份去樂團排練，如果唔係女團員呢件事，我唔會見過L哥既爸爸，跟本冇人會知L哥係密切接觸者，亦都唔會知L哥真係咁不負責任🤬，明知自己係密切接觸者都去樂團排練！

最後其實L哥可唔可以留喺樂團都係事小，反而係呢啲傷風敗德嘅事可大可小，如果受害人搞大佢報警，就算告佢唔入，佢都會俾官司纏身有排煩，有另一半既可能會搵上門，因為唔知點搵到L哥就會搵到樂團來搞。希望呢件事可以俾L哥一個好好反醒既機會啦，😮‍💨唉。