個多星期前爸爸揸車既時候發生左小觸碰，因為佢架車係靜止狀態之下鬆左一下brake架車郁咗一下而發生左觸碰另一架cut線去佢前面嘅車，所以真係唔稱得上係撞車，爸爸當時覺得好少事，因為爸曾經試過俾從後撞車，當時嚴重得多而爸爸只要求對方賠償實報實銷既金額，所以爸爸諗住最多都係一萬幾千畢竟只係少少甩油，不過幾日之後對方車主索償三萬幾蚊話要換過道車門，我冇覺得意外，因為就係年前Alan既車俾人揩到，Alan都係向對方索償幾萬蚊，當其時Alan同我講因為對方係揸既係Tesla，所以一定唔想報保險，而佢知道自己實則幾千蚊就可以整好自己架車，不過佢選擇掘對方，當時我都覺得好似理所當然一樣。

但當我見到爸爸呢件事以及佢舊時俾人撞既時候果種處理手法再對比好似Alan呢類人，我突然之間喺度諗到底由幾時開始呢個地方變成一個爾虞我詐既城市 ，而最恐怖嘅係自己慢慢地變成對呢種事好似習以為常一樣！

老實講我有啲慚愧，同時間真係要自己好好反省一下乜嘢先至係人性。