朋友經過兩星期無上小提琴課之後搵左一位新既小提琴老師上堂，新老師係畢業於HKAPA再加上國外深造小提琴回流嘅小提琴家，第一日上堂新老師當然會問朋友點解要轉老師，朋友講番佢之前想加入樂團既經歷，雖然前老師沒有絕對拒絕朋友加入樂團，但佢好明顯唔想朋友加入前老師自己所屬既樂團，不過前老師既樂團又可以收一個完全冇學過小提琴既人係到，講俾任何人聽都係唔公平，就算彈Harp彈到幾Professional，音樂感幾高都唔代表未學過都可以拉到小提琴又或者好似朋友既前老師講，只要肯面懵坐喺度就可以？仲要包括上台裝假狗表演？咁樣對嗰啲努力練習嘅人來講有意思嗎？樂團既團員仲需要努力嗎？我都認同請勁人來樂團幫忙既需要，但與完全裝假狗既表演係兩碼子既事。而對於朋友來講一個拉空弦拉到劏雞聲既小提琴手剛加入樂團都可以上台表演，但就阻撓一個跟自己學琴已經有兩級程度既學生連加入樂團，呢位老師既私心都好有啲問題。

另外就係朋友既前老師係上堂既時候經常對朋友講：「我都冇野可以教到你😅」，朋友最初覺得前老師只係謙虛，但經過左一年多既時間都經常講呢句說話，加上佢前老師對於唔想俾朋友加入樂團既考量，最起碼可以確定嘅係佢不斷discourage朋友去學習小提琴🎻既意欲，咁我同朋友講：「背後原因係咩其實冇咩所謂，同啲小人有關又好冇關又好，只要知道自己夾琴開唔開心，想唔想拉好小提琴就可以，唔想拉咪俾左部琴俾我😁，我都可以玩下！」

雖然我咁樣同我朋友講，不過我都有啲好奇，既然朋友既前老師都冇嘢可以教俾個學生嘅話，點解仲要繼續收人錢而唔介紹一位更好既老師俾我朋友呢？而最後欠個學生一堂課既話，咪乾脆俾返錢人哋囉而家過數好方便姐，而唔係叫人地上埋欠學生果一堂有啲核突啫🤣，不過我諗佢前老師應該係好多野煩，唔得閒理佢多。

其實成件事對我來講冇咩關係，諗落某程度上我更加係一個得益者，我唔使因為承諾而留喺樂團見到果個我幾十年來俾個良心佢當狗肺既Alan，老實講如果Alan係我早前番樂團果段時間私底下同我道歉，我反而我應該無條件就原諒咗佢，又或者朋友入左樂團既話，我都可能真係被迫要妥協，留住Alan呢個小人喺身邊。另外都有好大啟示既，自己小小既一席話其實對於人哋可以好大既影響，作為老師就更加！我就係因為Alan練琴求其，我口直心快咁講左啲難聽既說話所以至陪佢去政府樂團，幫佢搵老師，encourage佢加入樂團，陪練仲有之前既種種……etc. 不過到頭來換來既係我自討苦吃，就好似我勸Alan唔好搞到啲有小朋友既媽媽時，Alan對我講：「啲女自己痴埋來，我搞佢地係幫緊佢地炸，冇我佢地仲慘。」

而家諗番起來，真係自己攞來😅，不過都唔係件壞事，因為我已經盡力付出做我所能做，付出我所能付出，所以應該開心至係😁✌🏼！