好耐冇寫blog，不過真係要記低呢件事！

早幾日既星期五，因為早左到樂團排練既地方，當時只有另一位團員係到，反正人唔多就熱下身好集中精神咁拉pieces，點知Alan係我拉到一半既時候突然係我後面嗌「HELLO！」，我唔知佢係有心定無意，只知我被嚇到嘅同時見到佢喺度笑，真係好討厭，我同佢由細玩到大，但啊能自從上年自知自己理虧之後同我私底下係完全無聯絡，過時過節都唔會問候對方，但每當有樂團嘅人喺度嘅時候就扮冇野打招呼，真係好無聊🤨。

其實我上年離開樂團，都係因為我從Alan老師身上得知佢太多假面具，佢成日有意無意都喺啊A面前講B喺阿B面前講A，而我同佢最後既對話係完全冇鬧過佢一句半句或者任何爭吵，然而其實佢自知理虧之後就一路都唔敢搵我，仲要係我背後同我嘅朋友講是非，將佢自己理虧嘅事講成灰色，跟住我朋友叫佢自己同我交代，佢就講埋啲廢話當然亦冇搵過我去解決個問題，直至今年我返咗樂團之後，Alan就無啦啦係大家都冇再聯絡嘅情況之下WhatsApp我同我講聲「生日快樂」，跟住我返到樂團夾琴就係人前就扮冇野同我講野，如果喺工作遇到呢啲咁嘅小人我都會好假咁面對，但係我只係諗住去開開心心同人夾琴，我真係唔想咁假。

所以幾日前嘅星期五，當Alan係我後面嚇咗我一下之後，我忍唔住係另一位團員面前好直接咁同Alan講「其實你唔需要同我打招呼」，我知道咁樣好rude，但我真係唔想咁假，因為我去樂團只係諗住開開心心夾下琴。

老實講其實上年我同Alan之間嘅事都唔係咩咁大件事，相比起當年俾佢跣，搞到我要孭左條幾十萬嘅債，仲有我拜託佢買車佢買咗之後攞嚟溝女，當架車到我手既時侯係唔揸得既壞車，最後跟本冇正式揸過就劏左，仲有好多好多事發生過，其實次次都係我自己算數，不過今次有啲唔同，我喺唔同嘅人身上睇到唔同嘅佢，同我所認識嘅Alan好唔同，所以我冇再主動搵佢，不過見到嘅更加使我感到心寒，我當佢係朋友既時候，對佢來講我只係佢用來過橋抽板嘅踏腳石！

當年Alan因為玩車搞到轆爆卡，我用自己個名幫佢問人借錢，等佢唔好還minimum payment，佢讀書讀得唔好我幫佢入U，佢讀唔掂，我幫佢做埋功課幫佢GPA攞到2.8，之後我一番左香港佢自己唔生性畢唔到業，直到拉中提琴，佢拉得唔好，我特登book房陪佢練，陪佢參加音樂事務處處既樂團等佢培養興趣，之後幫佢搵老師入埋樂團，佢上咗軌道之後就開始怪怪，成日同我講佢老師背後講我乜咩咩咩……，不過我都唔點理佢，因為我唔想搞Politics，而至於佢去樂團有咩目的我就真係唔知，我只係知道我已經做晒我作為朋友可以做嘅嘢，所以我唔想幫佢扮嘢👿。當晚我同Alan講完叫佢唔使同我打招呼之後，我完全無視佢繼續開心夾琴排練🤣