尋日去剪頭髮，幫我剪頭髮嘅中醫師提起老表A，因為老表A都係經我介紹先至去搵呢位中醫師剪頭髮既，而中醫師朋友尋日剪頭髮嘅時候就講起老表A近日去搵佢剪頭髮並且提及樂團排練以及就嚟演出嘅事，同時間老表A避重就輕地引導中醫師朋友以為我仲同佢一齊喺樂團，所以我好直接咁同中醫師朋友講，因為老表A所以我已經離開咗樂團啦，原因係經過同老表A既老師私底下交談之後，我哋得知其實老表A真係一個非常表裏不一嘅人，對人對事係好有目的性，如果我繼續留喺樂團我怕會演變成鬧交，亦會影響樂團嘅運作，所以我選擇係演出之前樂團仲有磨合嘅時間既情況之下同幾位主要搞手交代之後就離開，總好過如果係演出之前先至爆出有事嘅話，就會影響到其他人！

而『冇人性』呢句話係老表A耐不耐就會講嘅口頭禪，好諷刺地佢對我真係冇咩人性，我繼續同中醫師朋友講，如果老表A唔係身有屎同冇人性既話，突然之間喺每個星期都會見到面嘅樂團排練時間唔見咗我都應該會搵吓我掛，不過直到今日佢連一個message都冇send過俾我，其實我真係好好彩，係冇穿冇爛嘅情況之下睇清楚一個人，我成日都怕誤會咗或者冤枉左其他人，不過呢件事令我好確切地睇清楚呢個人，一個由細玩到大嘅人，一個我唔介意用自身去擔保幫佢借錢嘅人，一個搞到我欠債嘅人，我一路都以為佢只係一個唔懂得人情世故、唔懂得表達自己以及鍾意溝女同玩車既朋友，所以我從來唔介意有冇回報咁樣去付出為佢好，但原來佢係一個好多面孔既人，所以係各人面前都有一種神秘感，係進一步令到自己有問題之前認清楚佢其實唔係一件壞事反而係我嘅福氣，而我要為佢做既事我已經做夠，佢唔珍惜同我之間既朋友關係我亦冇必要糾纏落去，失落感當然會有啦，但係呢啲嘢冇得強求，而且明知對方『冇人性」，仲要黐埋去真係自己攞嚟賤咩？！😤