朋友Z因為覺得美國更適合自己生活，加上冇經濟問題所以自己一個移民咗去美國，當時我已經同佢講其實有啲無謂，因為佢係美國冇咩特別工作可以做，父母又唔會同佢一齊過去，又冇小朋友。經過半年時間，尋日佢打俾我同我講最初生活還好，但完全settle down之後就覺得後悔。原來佢離開香港既原因係怕自己嘅財富貶值，對於呢啲問題我都唔可以加咩意見佢，只可以同佢講同樣嘅決定我一定會一生遺憾。

神或者呢個世界創造人類但係並沒有創造金錢同財富，人為左人類創造出來嘅金錢同財富而放棄天生同父母既緣份真係有點可惜，其實冇話對與錯，就好似情侶或者朋友關係一樣，真係做左自己可以做既就冇遺憾可言， 同樣道理有啲人攬住啲錢至覺得冇遺憾一樣，如果唔係都唔會有人窮得只有錢啦。

對我來講人生唔係有錢與否，而係經歷與及人與人之間既關係，有冇好好同父母生活過？真真正正為朋友好而努力過？有冇為所愛既人付出過？我明白呢啲唔一定對自己有收穫，有時候甚至令到自己好灰，但係呢啲就係我想要唔好後悔既人生，因為講到低我從來唔擁有任何東西，總有一日包括自己既身體都要還俾世界，而愛唔係要收到幾多，而係可以付出幾多，就好似朋友Z咁，自己一個走到美國，當父母都離開時回想自己其實係為咩呢？財富可能冇貶值，但換來嘅可能係一生既遺憾！

我亦因為父母選擇返來香港，最初都有唔開心，想搵個朋友講都難，但起碼我冇後悔，亦唔需要自欺欺人咁生活落去。有啲人覺得離開左就好似reset人生一樣，除非冇咗記憶如果唔係嘅話根本去到邊到都沒有所謂既從新生活有既只係自欺欺人。