早幾日同朋友食飯講起佢面對既一啲人際問題，佢覺得自己有時被人無理掌摑之後掌摑佢嘅人同佢道歉而佢原諒對方之後經過一段時間又再重複被掌摑與原諒對方都無數次，佢覺得自己好難去不斷去原諒同一個人。

我思考咗一陣我同佢講自己都有遇過唔少類似嘅人，不過我面對呢啲問題同有少少唔同，我同朋友講除咗原諒之外其實佢可以閃避嘅啫，唔通不斷俾人掌摑仲要繼續俾人掌摑再等對方道歉，好多時嬲對方其實冇乜意思但唔代表要繼續俾人欺凌或者令到自己唔開心，自己唔去閃避都有自己嘅責任。

就好似近期我有一位由細玩到大嘅朋友咁，舊時我係英國既時候叫佢幫我買車，佢幫我買左架車首先係要來幫佢自己女友搬屋之後果架車係我冇實際用過嘅情況之下就壞左泊左係我屋前超過好多個年頭，跟住差唔多兩年幾前本來佢應承咗車我去大提琴考試但臨近考試期佢因為我哋意見不合所以佢突然no show，好似呢啲咁既事係我哋由細到大都不斷地重複，我一直都唔係好介懷因為覺得大家係朋友而且可能只係佢既性格問題，但直至近呢一年我地有需要一齊出席同一個團體既活動我發覺原來佢對其他人並唔一樣，可能佢自己都唔多覺不過佢就好似我老豆講既咁佢一直搵緊我笨，再加上近期一啲事觸發左我反思之後我雖然冇嬲佢，不過就覺得需要保持番啲距離，就好似尋晚同今晚我都見到佢不過真係冇咩意欲想同佢講野，就算一齊離開會場，佢話車我返屋企都好，我都拒絕咗寧願自己一個坐港鐵離開。

所以原諒左一個人唔代表要繼續俾佢欺凌亦都唔代表要嬲佢嘅，而且有啲人係你點講佢都唔會明白，佢可能連自己傷害左人都唔理解仲要覺得你原諒佢係應該一樣，畢竟每一個人嘅經歷都唔同所以唔可以用自己嗰套強加係人哋身上既，但都要好好保護自己盡可能避開囉唔通真係不斷俾人打咩。