近幾個月都好忙冇時間將自己嘅事記落來，不過將呢件事記落嚟其實都係比自己一個反思嘅機會，所以就攞起iPad記落來。話說我有位都識左好多年既朋友A，當年因為我相信佢而打亂晒自己嘅大學學費計劃，最後仲要比多左幾倍嘅學費，及後呢位朋友A自告奮勇話幫我整車，佢話呢啲車咁簡單唔會整唔到嘅，最後因應佢嘅要求我同佢買到屋企車房一大堆工具，車房就好似變成佢既玩具房一樣，佢一輪積極玩過之後就開始慢慢放棄，小車就長期放喺車房裏面，沒有理會架車最後亦整唔到。不過我一直都冇怪佢，畢竟我覺得我都有責任，而且大家朋友一場！

我呢份人最衰就係對著果啲我真心當係朋友既人有果樣講果樣，亦因為咁我多次得罪朋友A，所以我都習慣咗每當我講咗啲嘢佢唔啱聽既話佢就會失蹤一輪😅，甚至連message都唔會回覆，就當佢失蹤咗接近一年嘅時候係上年我生日佢突然間給我訊息談及一啲拉琴既問，當其時我又係有話直說😅，然而我唔介意對方連一句「生日快樂」都唔同我講聲但係生日同我鬧交掛就唔係幾好受🤣🤣🤣

雖然係鬧咗交，但作為朋友我希望佢可以享受得到音樂，所以我搵咗整琴既朋友說服佢改變佢嘅諗法，跟住我陪佢去參加音統處既樂團以及幫佢搵過另一位老師，漸漸佢真正開始搵返拉琴嘅樂趣，亦都開始上軌道，呢一切當然都係佢自己既努力，我亦因而感到安慰☺️。

就係上年大概11月左右，我就提起佢係我生日當日同我鬧交嘅事，跟住佢就同我講話好多年前送咗一張卡比我，我叫佢唔好嘥錢，佢覺得我當時鬧緊佢咁，所以佢唔敢再給我恭賀或任何禮物，但其實佢講呢一句野嘅兩年前佢係有同我講「生日快樂」嘅，當晚仲係我請佢食麥記添🍔，只係佢自己唔記得😂❗️而我唔會為我嘅生日慶祝係因為我太婆係我多年前既生日離開左我地，不過我都放低咗啦。因為我覺得借自己生日令到其他在世既人開心都唔係一件壞事啊，所以當朋友A咁樣講起佢送卡比我，而令到佢難受左咁，我反省過之後好好咁同佢道歉左。亦因為咁我特登係上年佢既生日買咗份生日禮物比佢，之前我只會係見到佢嘅情況之下先至去買禮物既。其實我都好衰，我上年送份生日禮物比佢一方面當然係為咗慶祝佢嘅生日啦，另一方面其實我係好奇想睇吓佢係咪真係好似佢講送咭俾我而得到童年陰影嘅咁，還是係為咗掩飾而講呢⁉️😆事實係到咗我今年嘅生日我哋都係有見面佢亦都好似大前年一樣同我講咗一句「生日快樂」，但就唔好講禮物啦食飯都唔係佢俾錢，我當期時心裏面諗，佢可能好細個就要自己一個生活所以唔識得禮尚往來。不過就係同時間，我發覺佢喺我哋一齊去既一個團體裡面，佢由一個我講十句佢只講一句嘅人，突然變成一個會主動有話題同人傾偈嘅人，更加會出錢出力幫人，甚至將我送俾佢嘅嘢轉送其他人😳，我當時就意識到其實佢唔係唔識得待人接物嗰喎。

今年年初佢猛叫我一齊夾錢買架車，我同佢講我唔想同佢夾，因為我訂左一架新車，雖然要出年先至到香港，所以我叫佢唔好嘥錢買多架車，點知佢突然之間買咗落嚟，仲話喺保險單上加埋我個名，咁好啦既然你咁有我心，我應該同佢分擔使費，咁我就叫佢泊返喺我住果區既停車場，反正朋友A同我都係住喺同一區，而泊車月費就一人一半啦，我甚至提議因為佢拍喺屯門嘅停車場只係需要八百蚊，所以如果泊我個區嘅話會唔止呢個價錢，所以我提議假如要二千嘅話我就比千二蚊啦如此類推，而最後佢選擇泊喺屯門因為便佢返工換車，亦唔使我分擔佢嘅泊車錢，期間我冇問佢攞個架車嚟揸，而且佢借咗俾佢嘅朋友，跟住之後有日佢同我講佢想整到架車係一個完美嘅狀態之下先至俾我揸，當然直到最後我一次都冇揸過佢架車🤣🤣🤣！我屋企知道呢件事之後，媽同我講話老竇覺得佢為左第日方便借我架新車來揸，我答我媽：「我都唔理得佢諗咩囉，估來都冇意思，只係知道佢有佢自己嘅諗法，起碼唔係佢講到為左我而買架車返來咁就可以，因為事實係佢有佢自己既安排，我又冇佢架車既車匙加上架車又唔係我附近，我唔會咁無聊到叫人哋揸架車嚟俾我揸囉，咁佢要有咩想法我控制唔到！」當然呢件事得啖笑，我都唔知幾驚佢因為我買架車，我最初仲諗住俾返錢佢哈哈😆！

到左近期朋友A私底下應承咗幫一個我哋會一齊出席嘅團體去運送物資到一個活動，雖然我都會出席呢個活動但佢冇問過我嘅情況之下應承咗人，所以我唯有自己安排交通啦，安排之後亦都同朋友A交代左，直到接近活動嘅前幾日朋友A突然問我會唔會幫手運送物資，但係我一早就已經安排晒家人車我去最重要係應承咗食完飯先至去果個活動，點可能突然間放飛機呢？咁我就答佢唔得喎，跟住第二日我就喺WhatsApp收到由一個團員發出黎嘅群組邀請，同時間就收到朋友A九秒九嘅訊息✉️，訊息嘅意思大概係朋友A已經同團體裏面嘅人講咗我唔係同佢一齊出席活動但唔知點解果位團員無啦啦加我入去個群組裏面，感覺係佢唔想我喺群組裏面講任何野，我亦唔想複雜化件事所以就完全冇回覆個群組，而喺活動當日前後朋友A亦都冇再同我聯絡，亦因為朋友A自己私底下既安排，我早就已經安排好屋企人係活動結束慶功宴之後車我返屋企，畢竟我當日好似帶住支米加粒子炮嘅Z Z高達咁出席活動呢😅！

活動之後朋友A冇再聯絡我，可能都冇咩好講😅畢竟咁多年朋友都知佢係咁既人，而我應該係睇得太多熱血動漫小說受到過分嘅薰陶，成日希望生命中會有班將心比己嘅同伴出現，可惜現世大多數嘅人都係目的性強，為既係追求眼中嘅獵物而唔係享受生命嘅過程，只可以慨嘆大家追求嘅人生唔一樣，當然我唔會怪責朋友A畢竟每個人嘅選擇都唔一樣。其實自從上年我生日鬧交，我係俾自己一個機會，因為我怕我冇好好珍惜朋友A而後悔，所以經過一年來既觀察，我覺得我對朋友A已經做晒作為朋友既付出，我明知唔會有回報亦唔會介意，但我好明白自己唔鍾意係對錯分明既事上面不斷為自己掩飾而被證實錯誤之後亦唔會道歉仲要不斷爭拗嘅人。

不過令我最介意既係自己攞個心出來做朋友，但對方連少少朋友間嘅尊重都唔懂得，更加唔好講將心比己或者逆地而處，就係近呢幾星期朋友A同我喺港鐵車廂裏面裏面見到賣月餅嘅廣告，講起買月餅我都會送月餅俾朋友A屋企，佢話我送嘅月餅好食，我反問佢點解咁多年都冇買月餅俾我嘅，佢用講笑既形式咁講埋一啲不知所謂嘅答案使我非常之冇癮，其實真係好少事不過就好似一塊石頭🪨拋到平靜嘅湖水所引起嘅漣漪一樣，使我反思同朋友A之間既關係及記低呢件事，諗翻起呢咁多年嚟同朋友A嘅一切，我完全冇怪責佢，只係覺得都係時候保持返一啲距離，反正我都做咗我可以做嘅嘢都冇嘢後悔，所以都係時候抽身。😌