大提琴班同埋私人教授我都試過，起初我諗應該冇咩分別，但如果可以重新揀過嘅話我諗我一定會選擇一對一既私人教授來學大提琴！

首先如果四個人一班嘅過，老師唔會將一個鐘頭嘅課堂除四變成每人15分鐘，對於初次接觸大提琴嘅人都還好，但當去到要考級嘅時候，其實係好需要老師專注同針對個別學生既問題從而提供練習嘅方法俾學生參考改進。 我試過上班制堂既時候，當時嗰個老師連考試嘅 chromatic scale都冇教我就叫我去考試，而家諗返轉頭果次考試合格完全係我個鋼琴伴奏嘅功勞🙏🏼，因為班制關係當時嘅大提琴老師只係聽我拉過考試曲目一次就去考試😅。所以大提琴班既限制之下，老師係好難分配足夠嘅時間比每一個學生呢🤦🏻‍♂️，亦因為咁樣好多基本功都冇練得好，對於後期既學習會百上加斤！😭

最初參加班制既時侯我有一種錯覺，我認為同學之間會有一種互相追趕嘅感覺，可以令到大家一齊進步以及好似去咗拉樂團咁！但事實係大提琴班對於拉琴嘅進步空間唔係好大，尤其係考過試之後，當曲目需要練習，老師要因應同學們嘅練習進度而調節上堂嘅節奏，因為咁好多時會停滯不前，浪費嘅唔止係上堂嘅時間，而係一整個星期練習既機會，當然拉琴就係不斷循環練習，但如果係咁既話老師咪永遠都唔需要教新野囉？！拉空弦都好緊要嫁，唔通我要練到演奏級嘅拉空弦技術至可以學其他野？😂

至於班制係咪可以帶來好似樂團嘅感覺呢，拉過樂團之後我又完全覺得唔係嗰回事喎，因為大提琴班既同學們都係拉一樣既野，最初耳仔唔係好夠分析力嘅話，有時會變得好模糊，自己錯左都未必知，好彩嘅話老師留意到會提提你，唔好彩老師留意唔到又或者你自己唔夠膽拉嘅話咁你就一路都唔知自己係錯㗎啦！最慘係習慣左倚賴其他同學嘅感覺，慢慢會變到唔敢自己一個solo，越習慣咁樣拉琴會令到自己更加難以跳出comfort zone，長期倚賴同學同埋呢一位老師，要知道好嘅老師係會想你進步到有一日可以自己去拉琴而唔係成世跟住老師學琴嫁！而且如果你長期只係同其他大提琴拉一模一樣嘅嘢，根本唔可以同樂團去比較！

自己考完八級而家亦都有去拉樂團，我覺得最理想既學習方式係係從一開始搵一位適合自己既私人老師上堂，另外再參加正式既樂團！最好係有齊高中低聲部嘅樂團啦，雖然大提琴係好聽不過音樂唔係剩係得大提琴既音域㗎嘛，所以我覺得最基本係去一個弦樂團！因為咁樣可以鍛煉到耳仔既同時會拉到好多學大提琴未必會拉既樂譜同句式，因為大提琴喺樂團裏面好多時都未必係主旋律。當然如果有老師去帶領你去參加一個樂團會更易上手啦，係香港老師變成指揮既樂團好多，但老師變成一個聲部既首席帶領學生去參加樂團就真係唔多啦！

最後呢篇只係我一個小小嘅分享，每個人都有唔同既學習方式，而且每個人學琴嘅目的都唔一樣，我學大提琴只係想拉好琴，但我相信有啲人主要係為咗去識朋友同聯誼，又或者只係無聊去hea下都唔奇🤪，但要明白音樂世界既宏大，裡面唔係一小撮人認為好就係好，聲音本身沒有好壞既分別，但音樂係同文化及時代都有關係，我有一個小忠告，要接受呢個世界同其他人嘅標準，唔好變成一小撮自high既人！因為咁樣既話，唔好講你嘅音樂，就可能連音準同埋拍子都未必做得好，我嘅認知係音樂並不是把音符拉晒出嚟就叫做音樂，咁樣只係自high，係冇感染力㗎，音樂界裏面有好多俾面派對，我並唔反感，但係好就係好唔好就係唔好，要知道學識分別好同好嘅音樂都係學大提琴裏面嘅其中一環嚟嘅！而我亦都努力學習當中！💪🏼😅