尋日去咗剪頭髮，同髮型師傾開計，講開一啲家庭嘅問題，佢講到佢細個嘅時候唔係好鍾意一啲兄長，但係當人大咗之後可能受到宗教嘅影響，反而覺得人與人之間嘅關係係非常可貴。我諗佢可能想導化我啦，跟住我就同佢解釋，其實都唔係我唔去做，返嚟香港呢10年，我都嘗試過去做，就好似嗰時過節都會寄下賀卡俾親戚不過都係冇回覆，呢啲親戚仲要同我媽咪講冇收過，好笑嘅係嗰封賀卡仲係個email server上面!🤣

所以我學識唔好期待其他人，上至親情愛情友情，下至街上遇見既路人甲，都唔好有期待，可以做嘅只係好好做好自己認為啱嘅事，因為每個人對人對事既睇法都唔一樣。

就將親情愛情友情同埋街上遇到嘅路人甲各做一個例子，係咪所有嘅父母都會以自己嘅子女為優先呢？就我自己而言，我既經歷係我爸爸為左佢妹妹就係我中四就來要考試既時侯，我星期六要求留係屋企溫書都唔俾，我諗佢有佢對佢妹妹執着嘅理由嘅，呢個我管唔到喔！呢件事只係冰山一角，對於呢啲咁既野我而家都只係當笑話來去睇🤪

至於愛情就更加唔使多講啦，電視都有得你睇，講到天花龍鳳既人好多，但有幾多個係願意為對方真真正正咁去犧牲？大部份人都只係執着於對方起初嘅承諾，但唔會諗吓自己做過啲咩野，自己應承咗人嘅嘢又有幾多係兌現左㗎呢？要知道每一個唔兌現嘅承諾，就係一個用來打碎人地對自己好感既錘仔！可能只係一粒糖，可能只係一個時間，可能只係一句問候， 當呢啲錘仔加起上嚟嘅時候，又冇適當嘅補救，咁梗係會碎啦！

對於友情我就有一個更加深嘅體會，我有一個大家由細玩到大嘅朋友，佢移民咗去澳洲，雖然移民咗去澳洲但係依然都有聯絡，直至佢有女朋友，有一次佢同女友來香港旅遊行，我預早三個月約佢都約唔到時間，而當佢係香港嘅時候，就算明知大家只係一街相隔，佢都因為佢女友同妹妹嘅關係而諸多理由所以見唔到面，所以我都費事糾纏落去啦！

行街嘅時候總係有機會同一啲路人甲相撞，就算你主動避開佢佢都會撞到你，縱使明明係佢唔啱都好啦，佢唔會同你道歉仲要用怒火眼睛望住你！又或者商場幫人開門，路人甲唔單止覺得應份，總可能覺得你態度不夠殷勤！😂

呢啲咁樣嘅經歷我係過去10年遇到唔少，所以我學識嘅係做咗自己可以做嘅嘢就可以，對於唔會珍惜自己嘅人冇必要糾纏落去，亦都冇必要憎恨對方，同時間唔好一竹篙打一船人，因為人有好有壞既，我好好彩都有個好愛我同會將心比己既媽媽，有啲咩都講得既知己朋友同埋好好嘅老師！差啲唔記得咗我仲有一隻扮可愛嘅惡魔（Angie），一個喜歡照鏡嘅古惑仔（Sparkie）及一隻超級懶既伊利沙伯！我覺得呢啲就係我既福份！🙏🏼🙏🏼🙏🏼