由完全沒有接觸過弦樂到考到皇家音樂學院大提琴八級試(ABRSM Cello Grade 8)，我用了5年半既時間，時間唔長唔短不過係一個非常之正嘅過程，我覺得唔理任何年紀如果有機會既話都應該經歷一下！

以下係我對學習大提琴既小小回顧同埋分享，首先我既理解係學習既年期與級數其實冇直接關係，返而係因應級數樂章同埋要求既有唔同所以需要的技巧亦都會唔一樣，而每個人練習嘅過程同時間亦都唔一樣，所以冇必要去比較，唔需要去追趕其他人嘅年期及成績！

第二考到八級唔代表拉琴拉得好，我反而覺得拉琴拉得好嘅人一定可以考到八級既，咁又唔係代表考試無用，因為考試有佢既一套準則，可以俾學琴嘅人有一個明確嘅目標去練習，而不是自我感覺良好地去自High! 當然呢一套準則唔係人人都啱用，所以拉琴拉得好聽嘅人係考試未必考得好成績！

第三就算你幾有天份都好都一定係要練習㗎，我老師成日掛係嘴邊嘅一句說話：「練琴就是練習穩定性，不論係音階還是係樂章你拉得到一次兩次唔代表你次次都可以拉得好，往往係考試或上台嘅時候，就正正係你拉得最差嘅時候。」

第四因為大提琴與鋼琴唔一樣，基本上係任何時候都係會用自己嘅樂器，所以樂器既狀態及配件都會直接影響練琴既進度以及考試嘅成績。我自己就經歷過因為買入唔夠半年既琴，琴頸嘅角度出了問題，我估可能部琴是經由當時既老師所創立既工廠學院訂番來，所以佢好似唔係好想幫我免費維修，又或者呢位創院老師佢真的沒有足夠既提琴知識，所以佢以為幫我用紅酒嘅木塞頂住提琴上嘅指版，就可以解決一切既問題，就係咁我用左部急救既大提琴考了三級及五級既琴試，但這種急救既方法真唔應該長期使用嫁，更加唔好講用於長期練習之上，因為琴弦嘅拉力會變得不必要的緊，增加左手按琴弦嘅困難同時對練習其實沒有任何得着，因為琴弦係嘅角度係有佢特定既標準，過高或低都是唔應該既，後來我更認知到長期使用急救嘅方法係有機會破壞琴既結構嫁，好彩最後遇到位好既提琴醫生！

第五大提琴既價錢，是否貴一定好？平一定唔好聲？考八級一定要貴琴？我嘅認知係貴嘅唔一定係好聲，平嘅亦都唔一定係唔好聲，考八級亦都唔一定要貴琴。首先真正歐洲做嘅琴基本上都會比內地做嘅琴貴，但歐洲做嘅琴唔一定會比內地做嘅琴好聲，當然意大利所做嘅琴的保值能力會比大陸做嘅琴高啦。點解有啲人講考八級要用唔同嘅琴呢，舉例有一啲好平既提琴處理泛音既時侯有機會表現得好差，因為發音發得差既關係所以就可能要改變指法來去拉同一個音符，咁樂章可能變得非常之難拉！至於好貴嘅琴，價錢會係因為佢哋嘅產地，佢哋嘅做工，佢哋嘅木質，音質嘅投射力，而有所唔同！好難一一評價，但如果間係一個唔係好大既房裏面練琴嘅話，其實分別唔會好大反而弦線影響會大啲！

第六我覺得好琴不如好弓，一支好嘅琴弓會使你事半功倍，我最初學琴嘅時候好多時都將注意力擺咗喺琴上面，但其實最大問題係拉弓嘅問題！

第七選擇適合自己嘅老師，呢個應該係最最最重要既問題，我唔可以去評價每一位老師，因為每個人接受與同學習既方式都唔一樣，想要得到既野亦都唔一樣，就好似賣琴俾我嘅那位創院老師雖然佢教法唔適合我但又唔代表佢唔適合教其他人。每位老師教既方法都唔同，不過經過學琴呢幾年，我有一個少少既睇法，我覺得跟老師學琴唔係學點樣演奏一個樂章而係學練琴嘅方法，樂章既風格以及學識點樣分辨好同埋唔好既演奏，由其係初學既時侯，回想我就係跟左一個唔適合自己嘅老師學琴，雖然係考左三級同五級，但之後我返而要用大半年要從基本功再學過，就以拉音階為例，最初既老師不是教我有系統性地處理音階，結果係接觸每一個音階既時候都好似拉一首新既樂章一樣地咁去練習，我唔可以話呢一種係錯既方法，不過對我來講就比較教浪費時間而且練出來既結果亦都唔見得好，而家既老師係教我有系統地去練音階，進而可以將呢個練習嘅方法伸延到自己未學過嘅音階上面都適用。除左練習方式之外，樂章嘅風格也是需要學習嘅，譬如演奏巴洛克時期嘅作品拉到好似浪漫時期嘅作品一樣，雖然都可以好好聽，但就不再是巴洛克既音樂囉，我覺得係學習嘅過程裏面係應該要知道作品嘅風格，從而去感受作曲家既年代，當然如果有日你開演奏會，你甚至可以用Jazz既風格去拉Vivaldi既Concerto for two cello添，但就不再是古典音樂囉！同樣嘅道理我唔會用聽古典音樂嘅心態去聽動漫管弦樂表演一樣！所以學習既過程裡面，理解不同時期音樂嘅準則是需要的，學會之後你要點樣拉點樣表達就是你自己既自由了。除咗技術同埋文化之外，好既老師都應該抱有欣賞其他音樂家既胸襟，同時間鼓勵自己既學生多參與唔同機構所舉辦既樂團及跟唔同既音樂家所舉辦嘅Master Class，甚至乎有需要嘅話會將自己嘅學生介紹比更加好嘅老師，好讓學生有更好既成長，咁樣先至係一位好老師！

然而呢啲都只係我個人經驗之談，每個人都會因為佢地既經過而有唔同既體會！希望你都可以好好享受拉大提琴既樂趣喔！